Mbi 6000 shqiptarë kanë humbur mbi 5 milionë dollarë përmes një platforme të rreme investimi në kriptovaluta që operon jashtë çdo kuadri ligjor.
Një platformë mashtruese me emrin TXEX po shkatërron kursimet e mijëra shqiptarëve përmes një skeme piramidale të sofistikuar. Sipas denoncimeve të shumta, mbi 6000 persona janë prekur, me humbje totale që kalojnë shifrën e 5 milionë dollarëve. Pavarësisht përmasave, nuk ka asnjë reagim nga policia apo institucionet e tjera përgjegjëse.
TXEX prezantohet si aplikacion për investime “të sigurta” në kriptovaluta, por në fakt shfrytëzon rrjetet sociale dhe platformat e komunikimit si Telegram, Signal e WhatsApp për të joshur viktimat. Skema nis me reklama në Instagram e TikTok, ku individë anonimë shfaqen si “ekspertë tregu” dhe ftojnë njerëzit në grupe të simuluara investimi me komente dhe fitime të fabrikuara.
Fillimisht, përdoruesit nxisen të investojnë shuma të vogla përmes platformave të njohura si Binance, por më pas fondet transferohen në TXEX. Brenda aplikacionit, fitimet shfaqen sikur rriten çdo ditë, por kur viktima kërkon tërheqjen, i kërkohet një tarifë shtesë prej 400 dollarësh, kinse për verifikim. Në realitet, kjo është një metodë për të marrë edhe më shumë para përpara se skema të zhduket.
Shumë qytetarë raportojnë humbje deri në 5000 euro, duke përfshirë edhe dokumente personale si ID dhe foto, çka ngre rrezikun për keqpërdorim të të dhënave. Platforma lejonte në fillim tërheqje të vogla për të fituar besimin e përdoruesve, por sapo investimet shtoheshin, llogaritë bllokoheshin dhe kërkoheshin pagesa të tjera.
Më 17 prill 2025, Autoriteti i Mbikëqyrjes Financiare të Zelandës së Re e shpalli TXEX një mashtrim financiar, duke e lidhur me rrjetin ndërkombëtar “2139 Exchange”, i cili ka vepruar edhe në Azi e Afrikë. Taktikat e përdorura janë identike, duke përfshirë operatorë nga Ballkani dhe Azia Juglindore.
Platforma nuk figuron në QKB, nuk ka licencë nga Banka e Shqipërisë apo AMF, dhe nuk ka asnjë adresë apo zyrë fizike në vend. Megjithatë, komunikon në shqip dhe ka grupe të dedikuara për tregun shqiptar, duke e bërë rrezikun edhe më të madh.
Ka dyshime se disa prej administratorëve mund të jenë nga Lezha, çka shton nevojën për një hetim urgjent. Mijëra qytetarë kanë humbur jo vetëm kursimet e tyre, por edhe para të marra borxh, të mashtruar nga propagandë agresive që përdor manipulim psikologjik, teknologji deepfake dhe identitete të vjedhura. Autoritetet duhet të veprojnë menjëherë para se dëmet të bëhen të pakthyeshme.
