Unioni i Gjyqtarëve akuzon kryeministrin për ndërhyrje në drejtësi, duke e cilësuar gjuhën publike ndaj gjyqtarëve si presion të hapur dhe cënim të integritetit të tyre.
Unioni i Gjyqtarëve ka reaguar ashpër ndaj deklaratave të kryeministrit Edi Rama, të drejtuara kundër gjyqtarëve Hazbi Balliu dhe Klement Demiri. Sipas Unionit, akuzat për “keqpërdorim të pavarësisë gjyqësore” dhe paralajmërimet për masa ndëshkuese janë një ndërhyrje e papranueshme në punën e gjyqësorit.
Në reagimin e tyre, gjyqtarët theksojnë se sulmet personale dhe anatemimi publik i vendimmarrjeve gjyqësore krijojnë presion mbi trupën gjyqësore, duke u dërguar mesazhin se çdo vendim që nuk i pëlqen ekzekutivit mund të kthehet në objekt sulmesh. Sipas tyre, kjo bie ndesh me parimet kushtetuese të shtetit të së drejtës.
UGJSH ka sqaruar se është e hapur për kritika ndaj punës së gjyqtarëve, për sa kohë ato mbeten brenda kornizës ligjore dhe synojnë përmirësimin e besimit të publikut te gjykatat. Por, sipas tyre, komentet e përsëritura nga qeveria nuk kanë këtë qëllim dhe deformojnë faktet e proceseve gjyqësore.
Në deklaratë, Unioni rikujton se vendimet jepen “në emër të Republikës” dhe çdo palë e pakënaqur ka të drejtë ligjore të bëjë ankim në një gjykatë më të lartë, ose të kërkojë procedim disiplinor kur ka prova për shkelje. Ata e konsiderojnë të rrezikshme çdo tentativë për të ndëshkuar gjyqtarët jashtë këtyre mekanizmave.
Sipas Unionit, ndarja e pushteteve është shtylla kryesore e demokracisë dhe çdo veprim jashtë kuadrit kushtetues dëmton pavarësinë e gjyqësorit, duke minuar besimin e qytetarëve te drejtësia. Ata shprehen se sistemi ende po përpiqet të konsolidohet pas reformave të thella të dekadës së fundit.
Në fund, UGJSH i bën thirrje Këshillit të Lartë Gjyqësor që të reagojë dhe të marrë qëndrim të qartë kundër çdo sulmi ndaj gjyqtarëve për shkak të detyrës, duke mbrojtur pavarësinë dhe integritetin e sistemit gjyqësor.
