Kryebashkiaku Kreshnik Hajdari prezanton iniciativat verore, investimet në infrastrukturë dhe përgatitjet për nisjen e vitit të ri shkollor në qytetin e Kuçovës.
Në një intervistë për televizionin Apollon, Kreshnik Hajdari tregoi se kjo verë ka qenë e mbushur me aktivitete kulturore, artistike dhe panaire që kanë gjallëruar Kuçovën. Ai theksoi se Parku i Ri i gjelbëruar dhe sheshi kurativ janë shndërruar në qendra të rëndësishme të jetës sociale.
Sipas tij, aktivitetet kanë përfshirë të gjitha grupmoshat, duke sjellë pranë qytetit edhe emigrantë të rikthyer për pushime. Përmes këtyre organizimeve, synohet ruajtja e traditave dhe promovimi i identitetit kulturor të zonës.
Bashkia ka zgjeruar organizimet edhe në qendrat administrative, duke mbështetur projekte që forcojnë lidhjen e komunitetit me trashëgiminë lokale, raporton gazetari Ndriçim Gjoshi.
Hajdari foli gjithashtu për investimet në infrastrukturën arsimore, ku po kryhen ndërhyrje në çerdhe, kopshte dhe shkolla. Qëllimi, sipas tij, është që fëmijët të kenë kushte bashkëkohore mësimi.
Këto përgatitje janë pjesë e planit për nisjen e vitit të ri shkollor më 8 shtator 2025. Ai theksoi se këto investime do të ndikojnë drejtpërdrejt në cilësinë e edukimit dhe mirëqenien e nxënësve.
Kryebashkiaku u shpreh se Bashkia Kuçovë do të vijojë të mbështesë projekte që rrisin cilësinë e jetës, duke ndërthurur zhvillimin urban me ruajtjen e traditës dhe kulturës vendase.
