Pamjet nga qendra e votimit në Kute zbulojnë dhjetëra raste kontrolli të votës dhe shkelje flagrante të ligjit nga struktura politike
Në qarkun Fier, procesi zgjedhor është njollosur rëndë nga praktika të përsëritura të kontrollit të votës, që sipas dëshmive, përbëjnë një skemë të mirorganizuar nga grupet elektorale të lidhura me Belinda Ballukun. Ky fenomen është konstatuar në çdo qendër votimi, njësi administrative dhe bashki të zonës.
Pamje të publikuara nga qendra e votimit nr. 3242, në njësinë administrative Kute të bashkisë Mallakastër, tregojnë 69 raste ku komisionerë, vëzhgues dhe patronazhistë të Partisë Socialiste votojnë në vend të qytetarëve ose ndërhyjnë drejtpërdrejt në procesin e votimit, duke kontrolluar zgjedhjen e tyre.
Qendra e votimit, e cila duhet të ishte hapësirë e shprehjes së lirë të vullnetit qytetar, është kthyer në një skenë të hapur manipulimi, ku organizimi i akteve të paligjshme i atribuohet drejtpërdrejt Belinda Ballukut dhe grupit të saj elektoral.
Shkeljet përfshijnë prishjen e fshehtësisë së votës dhe raste të shumta të votimit më shumë se një herë, veprime që sipas ligjit dënohen deri në tre vjet burg. Megjithatë, organet e hetimit vazhdojnë të mos reagojnë, duke lejuar përsëritjen e këtyre praktikave kriminale.
Këto akte, të cilat shënojnë një nga momentet më të errëta të paligjshmërisë në 35 vitet e pluralizmit shqiptar, tregojnë mungesën e vullnetit institucional për të mbrojtur integritetin e zgjedhjeve dhe të drejtën e qytetarëve për të zgjedhur të lirë.
Heshtja e autoriteteve, sipas shumë zërave kritikë, jo vetëm që legjitimon manipulimin, por edhe e kthen procesin zgjedhor në një farsë të mirëfilltë, duke goditur në themel besimin e qytetarëve tek demokracia.
