Inflacioni bazë në Shqipëri shënon rritjen e pestë radhazi, duke arritur në nivelin më të lartë që nga fillimi i vitit 2024, ndërsa Banka e Shqipërisë sinjalizon presione të brendshme të qëndrueshme.
Inflacioni bazë ka vazhduar të ngjitet për të pestin muaj me radhë, duke arritur në 2.91% në korrik, nga 2.69% që ishte një muaj më parë. Ky është niveli më i lartë i shënuar që prej fillimit të vitit 2024, sipas të dhënave zyrtare të Bankës së Shqipërisë.
Në krahasim me të njëjtin muaj të vitit të kaluar, rritja është e dukshme. Në qershorin e vitit 2023, inflacioni bazë ishte në 2.29%, duke treguar një tendencë të qartë ngjitjeje gjatë gjithë vitit. Ndryshimet në peshën e produkteve brenda shportës së IÇK-së për vitin 2025 e kanë zgjeruar lehtë bazën e llogaritjes në 69.6%, nga 69% në vitin 2024.
Ky tregues përjashton produktet me luhatshmëri të lartë si ushqimet dhe energjia, me synimin që të ofrojë një pasqyrë më të pastër të rritjes së qëndrueshme të çmimeve. Banka e Shqipërisë ka theksuar se, megjithëse inflacioni total është nën objektivin prej 3%, presionet e brendshme nuk janë zbutur.
Ndikimet kryesore në këtë situatë vijnë nga mbiçmimi i lekut, ulja e inflacionit të importuar dhe goditjet e përsëritura nga ana e ofertës. Pavarësisht kësaj, aktiviteti ekonomik shihet pranë potencialit të tij, duke mbajtur të forta presionet për rritjen e çmimeve.
Të dhënat tregojnë se inflacioni bazë ka mbetur mbi inflacionin total dhe mbi mesataren e dekadës së fundit. Në qershor, inflacioni i brendshëm e kaloi inflacionin total dhe që nga marsi ka mbetur vazhdimisht mbi mesatare, duke treguar qëndrueshmëri të presioneve inflacioniste.
Në korrik, Banka e Shqipërisë mori vendimin për të ulur normën bazë të interesit nga 2.75% në 2.5%, në një përpjekje për të stimuluar aktivitetin ekonomik. Kjo ishte ulja e tretë brenda një viti.
Megjithatë, rritja e vazhdueshme e inflacionit bazë pranë kufirit 3% shihet si një sinjal që mund të sjellë ndryshime të tjera në politikën monetare në muajt e ardhshëm.
Edhe inflacioni bazë neto – që përjashton grupet e ushqimeve të përpunuara, përfshirë bukën dhe drithërat – ka shënuar rritje, duke arritur në 3.04% në korrik, nga 2.45% në qershor. Ky tregues mbulon rreth 44.6% të shportës së IÇK-së.
Sipas INSTAT, inflacioni total për korrikun u rrit në 2.5%, nga 2.4% në qershor dhe 2.1% një vit më parë, duke treguar se rritja e çmimeve tashmë po ndjehet në të gjithë shportën e konsumit.
