Pas tragjedisë në Maliq, familja Cani thekson se Martini dhe Eraldi nuk u vranë nga rrjetet sociale, por nga mungesa e sigurisë dhe dështimi i institucioneve.

Pas ngjarjes së rëndë në Pirg të Maliqit, ku 14-vjeçari Erald Xhejo humbi jetën pas një sherri mes bashkëmoshatarëve, ka reaguar familja Cani.

Në një deklaratë të fortë publike, familja Cani hodhi poshtë pretendimet se rrjetet sociale janë burim i krimeve të tilla. Ata theksuan se faji i vërtetë qëndron tek mungesa e masave konkrete të qeverisë, siguria e dobët në shkolla dhe mungesa e bashkëpunimit mes institucioneve, komunitetit dhe familjeve.

Ata sollën si shembull faktin që edhe pas mbylljes së TikTok, një tjetër krim i rëndë ndodhi në Korçë. Me tone ironike, familja Cani pyeti: “Kush do të fajësohet tani, Snapchat-i apo Instagram-i?”

Në deklaratë, ata nënvizuan: “Martini dhe Eraldi nuk u vranë prej rrjeteve sociale. Ata u vranë nga mungesa e sigurisë, nga papërgjegjësia institucionale dhe nga dështimi i sistemeve që duhet të mbrojnë jetën e fëmijëve. Mbyllja e një aplikacioni nuk e kthen realitetin mbrapsht.”

Familja kërkoi reforma të vërteta, jo vendime sipërfaqësore. Ata bënë apel që qeveria të marrë masa konkrete për rritjen e sigurisë në shkolla, përfshirjen e komunitetit dhe fuqizimin e sistemit shëndetësor, duke theksuar se vetëm kështu mund të shmangen tragjedi të tjera.

Tragjedia në Maliq ndodhi më 14 gusht, kur 14-vjeçari Xhejo mbeti i vrarë pas një përleshjeje në lokal. Policia arrestoi autorin e dyshuar, gjithashtu të mitur, si dhe disa familjarë të tij për përfshirje në ngjarje.

Familja Cani i shprehu ngushëllimet më të thella familjes Xhejo, duke u bashkuar me thirrjen e tyre për drejtësi. Ata nënvizuan se dhimbja e tyre është e njëjtë dhe se asnjë nënë nuk duhet të përjetojë tragjedinë e humbjes së fëmijës.

Ky reagim i fortë, i mbështetur mbi dy tragjedi të ngjashme, hap sërish debatin për dështimet e shtetit në garantimin e sigurisë së fëmijëve në shkolla dhe në jetën e përditshme.