Policia e Fierit dhe e Lushnjës kryen arrestime dhe procedime penale ndaj disa shtetasve për përndjekje, dhunë, drejtim mjeti në gjendje të dehur dhe posedim droge.
Në Fier, një 20-vjeçar me inicialet E. B. u arrestua nga policia, pasi dyshohet se kishte përndjekur një vajzë 17-vjeçare për katër muaj rresht. Arrestimi u krye nga specialistët e hetimit të krimeve të komisariatit lokal.
Gjithashtu, një 30-vjeçar nga Lushnja, me inicialet Xh. T., u ndalua nga policia rrugore pasi u kap duke drejtuar automjetin në gjendje të dehur. Ndaj tij u morën masat e menjëhershme ligjore.
Në një tjetër rast, një 15-vjeçar u procedua penalisht pasi gjatë kontrollit fizik iu gjetën disa doza me lëndë narkotike të llojit cannabis sativa. Dozat u sekuestruan nga policia dhe u dorëzuan si prova materiale.
Ndërkohë, në Lushnjë u proceduan penalisht disa shtetas për dhunë. Një 35-vjeçar nga Bulqiza, me inicialet V. H., dyshohet se për motive të dobëta ka goditur me grushte një 34-vjeçar me shtetësi ruse.
Po ashtu, dy banorë të Lushnjës, G. S. 26 vjeç dhe E. B. 32 vjeç, u proceduan pasi dyshohet se janë konfliktuar dhe kanë goditur njëri-tjetrin.
Të gjitha materialet e rasteve të mësipërme janë referuar në Prokurorinë e Fierit, e cila do të ndjekë hetimet dhe procedurat e mëtejshme ligjore.
