Një 14-vjeçar nga fshati Leminot akuzohet se vrau me thikë bashkëmoshatarin e tij në Pirg, pas një konflikti të mëparshëm mes tyre.
Ngjarja e rëndë ka ndodhur pasditen e të enjtes, rreth orës 17:00, në ambientet e jashtme të një lokali në fshatin Pirg, bashkia Maliq. Viktima është 14-vjeçari Erald Xhejo nga fshati Zvirinë, ndërsa autori i dyshuar është Enedio Guri, gjithashtu 14 vjeç, nga fshati Leminot.
Fotot e publikuara në rrjetet sociale tregojnë se Guri kishte pozuar më parë me një armë gjahu tip çifte, duke shoqëruar imazhin me mbishkrimin: “Mos më kërko, unë nuk vij. Por shfaqem aty kur s’ta pret mendja.” Në krah, ai mban një tatuazh me simbolin e një kallashnikovi.
Sipas dëshmive jashtë kamerave, mes dy adoleshentëve kishte patur një konflikt verbal disa kohë më parë. Burime nga shokët e tyre tregojnë se Guri njihej si një djalë problematik, i përfshirë shpesh në situata konfliktuale me bashkëmoshatarët.
Të dhënat nga vendngjarja theksojnë se takimi mes tyre nuk ishte i planifikuar. Të dy ndodheshin rastësisht në të njëjtin lokal kur njëri prej tyre kërkoi të sqaronte situatën. Debati u përshkallëzua shpejt, dhe Guri dyshohet se nxori nga xhepi një mjet prerës, duke goditur për vdekje Xhejon.
Policia ka nisur hetimet për zbardhjen e plotë të rrethanave, ndërkohë që arma e krimit, e dyshuar thikë, ende nuk është gjetur. Ngjarja ka tronditur komunitetin lokal, duke ngritur shqetësime për përfshirjen e adoleshentëve në dhunë të rëndë.
