Kombëtarja shqiptare U17 u mposht 6-0 nga Italia në miqësoren e dytë, duke mbyllur turin me vetëm një gol të shënuar dhe dhjetë të pësuar.
Kombëtarja shqiptare U17 zhvilloi sot në qendrën stërvitore të FIGC në Coverciano miqësoren e dytë ndaj Italisë, duke pësuar një tjetër humbje të rëndë. Pas disfatës 4-1 në sfidën e parë, kuqezinjtë e vegjël u dorëzuan pa kushte përballë dominimit total të vendasve.
Takimi i sotëm nisi me presion të menjëhershëm nga italianët, të cilët zhbllokuan rezultatin që në minutën e 7-të me Perilo. Më pas, Donato dhe Pisati dyfishuan e trefishuan shifrat, duke e mbyllur pjesën e parë 3-0.
Në pjesën e dytë, Italia vazhdoi të shënonte me lehtësi. Perilo realizoi golin e dytë personal, ndërsa Fabri dhe Petrone vulosën rezultatin final 6-0. Ky epilog e çoi bilancin e dy takimeve në vetëm një gol të shënuar dhe dhjetë të pësuar për Shqipërinë.
Këto miqësore ishin testet e para të trajnerit të ri Fatjon Fafaj, i cili debutoi në pankinën e kësaj grupmoshe me synimin për të ndërtuar ekipin për ndeshjet kualifikuese të ardhshme. Por shifrat e rënda ngrejnë alarmin për nivelin aktual të skuadrës.
Pavarësisht rezultateve zhgënjyese, këto përballje shërbyen për të evidentuar pikat e dobëta dhe për të dhënë sinjale se nevojitet punë intensive në mbrojtje, organizim dhe efikasitet para portës.
Shqipëria U17 luajti me formacionin: Lleshi, Mezani, Varesis, Bilishti, Vata, Marku, Kurtulaj, Qosja, Luka, Ymeri, Mali. Gjatë lojës u aktivizuan edhe Balla, Uldedaj, Shahini, Sulejmani, Matraku, Uruçi, Muslika dhe Binishi.
