Dy shtetas serbë dhe një maqedonas u gjetën të masakruar në një vilë me qira në Santa Cruz, në një krim të lidhur me rrjetin ndërkombëtar të trafikut të drogës.
Një ngjarje makabre ka tronditur qytetin e Santa Cruz në Bolivi, ku tre shtetas të huaj – dy nga Serbia dhe një nga Maqedonia e Veriut – u gjetën të vrarë në mënyrë brutale. Hetimet e para po e lidhin ngjarjen me aktivitetin e një karteli ndërkombëtar të drogës që operon në Amerikën Latine.
Policia lokale zbuloi trupat e Miljan Đekić, 38 vjeç nga Nishi, Dejan Lazarevski, 47 vjeç nga Strumica, si dhe të një personi të tretë të njohur me nofkën “Mali Kosta”, ende të paidentifikuar zyrtarisht. Të tre ishin vendosur në qese të zeza plastike, të mbyllura me ngjitës dhe të fshehura në kuzhinën e vilës, gati për transport.
Banorët e zonës treguan se natën e ngjarjes, rreth orës 23:00, nga vila dëgjoheshin muzikë e lartë dhe britma të frikshme. “Pas asaj çasti gjithçka u qetësua. Thirrëm policinë, e cila mbërriti menjëherë dhe bllokoi zonën,” thanë dëshmitarët për mediat boliviane.
Raporti mjeko-ligjor përshkruan skena të rënda torture. Një nga viktimat ishte qëlluar në tëmth pas torturës, tjetri kishte dy plumba në pjesën e pasme të kokës, ndërsa i treti kishte kafkën e thyer, duke u besuar se ka ndërruar jetë nga goditjet para të shtënave.
Sipas burimeve të hetimit, mënyra e ekzekutimit tregon për një akt të planifikuar mirë nga autorët, duke forcuar dyshimet se viktimat kishin lidhje të ngushta me të ashtuquajturin “Kartel Ballkanik”, një rrjet i fuqishëm i trafikimit të kokainës në Amerikën e Jugut.
Autoritetet boliviane kanë intensifikuar operacionet për gjetjen e autorëve dhe zbardhjen e plotë të motivit, ndërsa ngjarja ka zgjuar reagime të forta si në rajonin e Ballkanit ashtu edhe në mediat ndërkombëtare.
