Trump i siguroi aleatët evropianë dhe Zelenskyn se nuk do të negociojë ndarjen e territoreve me Putinin, duke vënë si prioritet armëpushimin në Ukrainë.
Presidenti Donald Trump u ka bërë të qartë liderëve evropianë se gjatë takimit të tij të planifikuar këtë javë me presidentin rus Vladimir Putin në Alaska nuk do të diskutojë për ndarje territoresh. Në një bisedë telefonike të mërkurën, ku mori pjesë edhe presidenti ukrainas Volodymyr Zelenskyy, Trump theksoi se objektivi kryesor është sigurimi i një armëpushimi në Ukrainë.
Burime diplomatike nga Evropa dhe SHBA konfirmojnë se Trumpi dhe aleatët e tij ranë dakord se pa një armëpushim nuk mund të nisin negociatat për paqe. Megjithatë, disa liderë evropianë kanë mbetur me përshtypjen se Trumpi nuk është shumë optimist për rezultatet e takimit me Putinin.
Ky takim pritet të zhvillohet të premten, vetëm pak ditë pas njoftimit të papritur të Trumpi javën e kaluar. Nervozizmi në radhët e aleatëve është rritur pas deklarimeve të mëparshme të presidentit amerikan, ku ai kishte lënë të kuptohej se mund të kishte “shkëmbime territoresh” mes Rusisë dhe Ukrainës.
Sipas burimeve, gjatë bisedës telefonike të së mërkurës, të gjithë liderët ranë dakord se çdo vendim për kufijtë territorialë duhet të jetë në dorën e Ukrainës. Ata po ashtu pajtohen se, nëse Putin refuzon armëpushimin, Trumpi mund të vendosë sanksione të reja kundër Rusisë.
Disa zyrtarë evropianë kanë shprehur optimizëm për qasjen e Trumpit ndaj takimit, duke theksuar se prioriteti i tij është ndalimi i luftimeve. Ata besojnë se territori ukrainas nuk do të negociohet pa pjesëmarrjen e Kievit.
Zëdhënësja e Shtëpisë së Bardhë, Karoline Leavitt, refuzoi të japë detaje për bisedën, por theksoi se Trump është i vendosur të ndalë luftën dhe vrasjet, duke e quajtur takimin me Putinin “një moment të rëndësishëm” në këtë proces.
Pas telefonatës, Trump e përshkroi bisedën si “shumë të mirë” dhe sugjeroi se një takim i dytë mes tij, Putinit dhe Zelenskyt mund të ndodhë menjëherë pas të parit. Sipas tij, ky takim i dytë do të ishte “më produktiv” pasi i pari do të shërbente për të kuptuar pozicionet e palëve.
Trump paralajmëroi gjithashtu se Rusia do të përballet me “pasoja të rënda” nëse Putin nuk pranon t’i japë fund luftës.
Zëvendëspresidenti JD Vance, i cili mori pjesë në thirrje, e cilësoi përfundimin e luftës në Ukrainë si “një nga objektivat më të rëndësishëm të sigurisë në Evropë”.
