Mallakastriotët përmbyllin përgatitjet me rezultate solide dhe presin me ambicie përballjen e parë ndaj Tiranës në shtëpi më 23 gusht.
Bylisi i Mirel Josës ka hyrë në fazën përfundimtare të përgatitjeve, duke fokusuar çdo seancë stërvitore te sfida hapëse me Tiranën në Ballsh. Rezultatet e fundit në miqësore kanë treguar një skuadër solide: pas barazimeve 0-0 me Lushnjën dhe 1-1 me Apoloninë, mallakastriotët u ndalën sërish në 0-0 ndaj Partizanit, një prej rivalëve kryesorë për titull.
Në fushë u duk qartë dora e Josës, me një Bylis më kompakt dhe të disiplinuar taktikisht. Trajneri aktivizoi të gjithë lojtarët e grumbulluar, duke përfshirë edhe afrimin e fundit, mbrojtësin 18-vjeçar malazez Koita, i cili në pjesën e dytë bëri një paraqitje të spikatur.
Klubi ka testuar të gjithë elementët gjatë kësaj periudhe dhe duket gati për sezonin, megjithëse drejtuesit duan ta përforcojnë edhe më shumë ekipin. Në ditët në vijim pritet të firmosin një portier, një mbrojtës të djathtë dhe ndoshta një sulmues, afrime që do të mbyllin merkaton verore.
Skuadra mori një ditë pushim, por sot rikthehet në grumbullim në Ballsh. Më 13 gusht është programuar prova gjenerale kundër Panetolikos, skuadër e Superligës greke. Nuk përjashtohet edhe një tjetër test deri në nisjen e kampionatit, ndoshta me një ekip të Kategorisë së Parë.
Përmendet edhe mundësia e një miqësoreje me Luftëtarin, por kjo mbetet për t’u konfirmuar. Deri më 23 gusht, kur do të luhet ndeshja e parë ndaj Tiranës, stafi teknik do të punojë për të fiksuar formacionin bazë dhe për të integruar afrimet e reja.
Drejtuesit lënë të hapur mundësinë e një surprize cilësore në fund të merkatos, me synimin që Bylisi të hyjë në garë jo vetëm për mbijetesë, por edhe për të surprizuar rivalët që nga java e parë.
