Në malin e Llogarasë u qëlluan me armë gjahu 22 kuaj të lirë, duke shkaktuar plagë të rënda, vdekje dhe tronditje të thellë te komuniteti lokal.

Një akt i rëndë dhune ndaj kafshëve ka ndodhur në malin e Llogarasë, ku 22 kuaj të lirë u goditën me armë gjahu. Katër prej tyre humbën jetën menjëherë, ndërsa të tjerët u shpërndanë të plagosur e të frikësuar në zonën pyjore.

Sipas pronarëve dhe aktivistëve të mbrojtjes së kafshëve, një pjesë e kuajve ka nevojë urgjente për ndërhyrje veterinare. Për shkak të traumës, ata nuk po arrijnë t’i lokalizojnë dot të gjithë kafshët e mbetura.

Pamjet nga vendngjarja janë tronditëse dhe tregojnë qartë brutalitetin e ushtruar ndaj tufës. Banorët pohojnë se nuk është hera e parë që kafshët në këtë zonë bëhen objekt sulmesh, por përmasat e kësaj masakre kanë shkaktuar një reagim të ashpër publik.

Në një intervistë për një televizion lokal në Vlorë, pronari i kuajve u shpreh se autoritetet u njoftuan menjëherë, por deri më tani nuk është marrë asnjë masë konkrete. Aktivistët kërkojnë hetim të plotë, ndëshkim të autorëve dhe forcim të ligjeve për mbrojtjen e kafshëve të lira.

Ata paralajmërojnë se mungesa e reagimit nga institucionet vetëm sa nxit përsëritjen e akteve të tilla mizore. Ngjarja ka rihapur debatin mbi përgjegjësinë e autoriteteve për ndjekjen penale të dhunuesve të kafshëve dhe nevojën për kontrolle më të rrepta të armëve të gjahut në zonat e mbrojtura.

Ky rast është kthyer në simbol të kërkesës për reforma urgjente në mbrojtjen ligjore të kafshëve në Shqipëri, për të parandaluar që skena të tilla të mos përsëriten më.