77 bimë narkotike u zbuluan dhe asgjësuan në Visokë, ku policia arrestoi në flagrancë një 58-vjeçar të dyshuar si autor i kultivimit të paligjshëm.

Shërbimet e Komisariatit të Policisë Mallakastër kanë zhvilluar një operacion të gjerë kontrollesh në kuadër të planit operacional “Koordinata”, duke synuar parandalimin dhe goditjen e rasteve të kultivimit të kanabisit.

Gjatë kontrollit në fshatin Visokë, policia konstatoi një parcelë të mbjellë me 77 bimë të dyshuara narkotike të llojit Cannabis Sativa. Një pjesë e bimëve u sekuestrua si provë materiale, ndërsa pjesa tjetër u asgjësua në vend përmes djegies.

Në momentin e ndërhyrjes, në parcelë u kap në flagrancë shtetasi Kastriot Xhemalaj, 58 vjeç. Ky i fundit u arrestua menjëherë dhe akuzohet për veprën penale “Kultivimi i bimëve narkotike”.

Policia theksoi se operacioni “Koordinata” do të vijojë me intensitet në të gjithë territorin e qarkut Fier, me fokus në identifikimin dhe asgjësimin e çdo rasti të kultivimit të paligjshëm.

Materialet procedurale lidhur me këtë rast i janë referuar Prokurorisë së Fierit për veprime të mëtejshme ligjore.

Ky aksion është pjesë e një fushate të zgjeruar për të frenuar prodhimin e lëndëve narkotike në zonat rurale dhe për të çmontuar rrjetet e përfshira në këtë aktivitet kriminal.