Në vitin 2024, kompania koncesionare arkëtoi 22 milionë euro nga tarifa e kalimit, duke angazhuar 45 punonjës vetëm për mbledhjen e saj dhe 26 të tjerë për mirëmbajtjen teknike të rrugës.
Qeveria shqiptare ka besuar mirëmbajtjen e Autostradës Durrës-Kukës te kompania “Albanian Highway Concession”, e cila operon në bazë të kontratës koncesionare ROT (Rindërtim, Operim, Transferim). Tarifa prej 5 eurosh për automjetet e vogla siguron funksionimin dhe mirëmbajtjen e këtij segmenti për 30 vite, duke nisur nga viti 2017.
Në vitin 2024, kompania raportoi të ardhura totale prej 3.6 miliardë lekësh, me një rritje të ndjeshme prej 68% në krahasim me vitin paraardhës. Nga kjo shumë, të ardhurat neto nga tarifa e kalimit ishin 1.85 miliardë lekë, duke shënuar një zgjerim prej 16%. Një pjesë e konsiderueshme e të ardhurave, rreth 1.74 miliardë lekë, përfaqësojnë vlerën e investimeve të kryera në rrugë dhe do t’i kompensohet kompanisë në vitet në vijim përmes tarifave.
Sipas raportit zyrtar, kompania punësonte në fund të vitit 2024 gjithsej 85 persona, nga të cilët 43 ishin të dedikuar për mbledhjen e tarifave, ndërsa 26 mbulonin mirëmbajtjen dhe operacionet teknike. Pjesa tjetër përfshinte staf administrativ, drejtues dhe një mjek.
Të ardhurat bruto nga tarifa arritën në 2.15 miliardë lekë (rreth 22 milionë euro), nga të cilat 277 milionë lekë iu kthyen shtetit, sipas kushteve të kontratës që parashikon kthimin e 60% të të ardhurave që kalojnë limitin e përcaktuar. Shpenzimet për mirëmbajtjen rutine dhe atë dimërore arritën në 845 milionë lekë, duke përfshirë operimin, inspektimin e infrastrukturës dhe mirëmbajtjen e sistemit të taksimit.
Gjithashtu, shpenzimet për nënkontraktorët, kryesisht ndërtimin e Urës së re të Kukësit, ishin rreth 1.75 miliardë lekë. Fitimi para tatimit në vitin 2024 u rrit me 16% në 247 milionë lekë. Vlera totale e investimeve në rrugë, përfshirë edhe ndërtimin e urës, arriti në 9.1 miliardë lekë.
Autostrada e Paqes, si pjesë e rrjetit europian TENT, lidh Shqipërinë me Kosovën dhe Serbinë përmes një infrastrukture moderne dhe është financuar pjesërisht nga Bashkimi Europian. Kjo rrugë, me gjatësi 314 kilometra, nis në Lezhë dhe përfundon në kufirin me Bullgarinë në Merdarë, duke kaluar përmes Prishtinës dhe Nishit.
