Në tremujorin e parë të 2025 numri i të punësuarve dhe të papunëve ra për shkak të largimit të masiv të shqiptarëve jashtë vendit
Treguesit kryesorë të tregut të punës në Shqipëri shënuan rënie të menjëhershme në tremujorin e parë të vitit 2025, sipas të dhënave të INSTAT. Numri i të punësuarve u ul me rreth 10 mijë persona krahasuar me të njëjtën periudhë të vitit 2024, ndërsa të papunët ranë me 2,900 persona.
Në grupmoshën 15-29 vjeç, ku papunësia mbetet më e lartë, numri i të papunëve ishte 39.5 mijë, me një rënie të lehtë krahasuar me vitin e kaluar. Ndërkohë, numri i personave joaktivë apo “dembelëve” u reduktua me mbi 3,800, duke shënuar një ulje në 726,214 persona nga 730,103 një vit më parë.
Forca e punës gjithashtu pësoi tkurrje, duke humbur 12,694 veta në krahasim me tremujorin e parë 2024. Megjithëse në vitet e fundit kjo forcë ishte në rritje për shkak të ndryshimeve demografike, tani po ndikohet nga largimi masiv i shqiptarëve, sidomos të rinjve dhe të aftëve për punë, jashtë vendit.
Ekspertët e tregut të punës vlerësojnë se kjo situatë nuk shpjegohet vetëm nga lëvizjet e zakonshme në treg, por kryesisht nga emigracioni i lartë. Shumë shqiptarë që më parë ishin të punësuar apo në kërkim të punës tani jetojnë dhe punojnë jashtë, duke u larguar edhe nga statistikat kombëtare.
Sipas të dhënave zyrtare, në 1 Janar 2025, popullsia e Shqipërisë ishte 2.36 milionë banorë, me një rënie prej 1.8% në krahasim me censin e vitit 2023. Tkurrja prej 27-30 mijë banorësh në vit, kryesisht në moshat e reja, pritet të vazhdojë dhe të komplikojë më tej tregun e punës.
Migracioni neto negativ ka arritur shifra shqetësuese, me mbi 72 mijë persona larguar nga vendi vetëm në dy vitet e fundit, duke shtuar presionin mbi tregun lokal të punës dhe ekonominë shqiptare.
