Dy vatra zjarri në Fier digjnin toka bujqësore dhe kallamishte, tymi i zi përfshin zonat e banuara pranë qytetit.
Dy flakë të mëdha zjarri janë raportuar pasditen e sotme në Fier, njëra prej tyre pranë fshatit Daullas dhe Mbrostar dhe tjetra në periferi të qytetit në Çeligradë. Zjarret kanë kapluar sipërfaqe të gjera me tokë bujqësore dhe kallamishte, ndërsa re të dendura tymi kanë mbuluar edhe zonat e banuara, përfshirë vetë qytetin e Fierit.
Në vendngjarje janë angazhuar forcat zjarrfikëse, të cilat po përpiqen ta mbajnë situatën nën kontroll. Megjithatë, ndërhyrja e tyre po has vështirësi për shkak të erës së fortë, që ndihmon në përhapjen e flakëve dhe e bën më sfidues frenimin e zjarreve.
Për momentin, shkaktarët e zjarreve nuk janë përcaktuar ende nga autoritetet përgjegjëse. Ato u bëjnë thirrje qytetarëve të jenë të kujdesshëm dhe të shmangin çdo veprim që mund të shkaktojë apo përkeqësojë situatën, sidomos në kushtet e thatësisë së lartë dhe temperaturave të ngrohta.
Situata mbetet nën vëzhgim dhe forcat zjarrfikëse po vijojnë punën për parandalimin e përhapjes së mëtejshme të zjarreve, duke synuar mbrojtjen e banorëve dhe pasurive në zonë.
