Koncesioni i kontrollit mjekësor bazë solli fitime neto prej 2.5 milionë eurosh për pronarët gjatë vitit të kaluar, me rritje prej 34% falë uljes së shpenzimeve operative.
Koncesioni për Kontrollin Mjekësor Bazë, që i është dhënë kompanisë 3P Life Logistics, arriti të gjenerojë 2.45 milionë euro fitime neto gjatë vitit 2024. Sipas bilancit zyrtar të dorëzuar në Qendrën Kombëtare të Biznesit, ky rritje e ndjeshme e fitimeve erdhi kryesisht nga ulja e kostove, që mundësoi një zgjerim prej 34% të fitimit krahasuar me vitin paraprak.
Në vitin e kaluar, kompania koncesionare arkëtoi nga buxheti i shtetit 730 milionë lekë, rreth 7.5 milionë euro në total, si tarifë për kryerjen e kontrollit mjekësor të popullsisë. Nga kjo shumë, shpenzimet totale të biznesit ranë në 492 milionë lekë, përfshirë edhe tatimin mbi fitimin, duke nxjerrë kështu rezultatin neto pozitiv për pronarët.
3P Life Logistics është kompania që ka marrë në pronësi koncesionin, dhe ajo është në pronësi të dy aksionerëve kryesorë: Marketing & Distribution me 80% të aksioneve dhe Trimed me 20%. Kompania Marketing & Distribution kontrollohet nga Vilma Nushi, ndërsa Trimed ndan pronësinë mes Gentiana Peshkatarit dhe Endrit Hidos.
Ndërsa Vilma Nushi zotëron pjesën më të madhe të koncesionit përmes kompanisë së saj, Endrit Hido, nipi i saj, përfaqëson interesat familjare edhe në Trimed. Kjo i jep familjes Nushi një kontroll efektiv prej 90% të koncesionit fitimprurës të Check Up-it.
Megjithatë, koncesioni është nën hetim të thelluar për shkelje të dyshuara korruptive nga Prokuroria e Posaçme Kundër Korrupsionit dhe Krimit të Organizuar (SPAK). Hetimet vazhdojnë ndërkohë që pronarët vazhdojnë të përfitojnë nga ky biznes.
Nga të dhënat e bilancit rezulton se dy aksionerët kryesorë të koncesionit kanë tërhequr rreth 2 milionë euro si dividentë nga fitimet e vitit të kaluar. Kjo tregon qartë përfitimet direkte financiare të pronarëve edhe përkundër hetimeve në zhvillim mbi procedurat e dhënies së koncesionit dhe menaxhimit të tij.
