Viva Fresh përfundon blerjen e Spar Albania për 36.4 milionë euro, duke zgjeruar ndjeshëm rrjetin e saj të shitjeve me pakicë në Shqipëri dhe përforcuar praninë në tregun rajonal.
Kompania kosovare Viva Fresh ka finalizuar blerjen e zinxhirit të dytë më të madh të supermarketeve në Shqipëri, Spar Albania, në një marrëveshje që arrin vlerën e 36.4 milionë eurove. Transaksioni i plotë u financua kryesisht me një kredi prej 25 milionë eurosh nga Banka Europiane për Rindërtim dhe Zhvillim (BERZH), që synon mbështetjen e zgjerimit të Viva Fresh në tregun shqiptar të pakicës.
Viva Fresh zotëron rrjetin më të madh të supermarketeve në Kosovë dhe operon gjithashtu në Maqedoninë e Veriut me markat Viva Fresh Store dhe Super Kit Go. Nën drejtimin e biznesmenit Xhevdet Rexhepi, kompania po zgjerohet në mënyrë të shpejtë dhe strategjike në rajon. Spar Albania, për vitin e kaluar, shënoi xhiro prej 12 miliardë lekësh, me rritje 15% në krahasim me vitin paraardhës, edhe pse fitimi para tatimit u ul pak në 402 milionë lekë.
Në nivelin e franchise-ve, Spar Albania renditet si rrjeti i dytë më i madh në Shqipëri, pas Big Market, duke përfshirë 92 markete dhe katër hipermarkete sipas faqes zyrtare të kompanisë. Për grupin Balfin, nën kontrollin e Samir Manes, kjo është shitja e dytë e rëndësishme në sektorin e retail-it, pas shitjes së rrjetit Euromax në vitin 2007, i cili më pas ndryshoi pronësi disa herë.
Investimet nga Kosova në Shqipëri po shfaqin një rritje të ndjeshme vitet e fundit. Për vitin 2024, ato arritën në 96 milionë euro, një rritje prej 32% krahasuar me vitin 2023. Në fund të vitit 2024, stoku total i investimeve kosovare në Shqipëri arriti në 422 milionë euro, duke shënuar një rritje prej 37% në një vit.
Sipas të dhënave të INSTAT, në Shqipëri funksionojnë aktualisht 582 kompani me kapital nga Kosova, prej të cilave shumica operojnë në sektorin e shërbimeve, ndërsa një pjesë më e vogël është aktive në prodhim. Ndërmarrjet me më pak se katër punonjës përbëjnë mbi 82% të totalit, duke treguar një dominim të biznesit mikro në këtë komunitet investitorësh.
Rritja e numrit të ndërmarrjeve dhe vlerës së investimeve nga Kosova konfirmon trendin pozitiv të zgjerimit ekonomik dhe bashkëpunimit tregtar mes dy vendeve, duke krijuar mundësi të reja për zhvillim dhe forcim të lidhjeve ekonomike rajonale.
