Radiotelevizioni Shqiptar rrezikon shkatërrimin financiar për shkak të abuzimeve dhe menaxhimit të dobët, me dëme mbi 8 milionë euro
Radiotelevizioni Shqiptar ndodhet në një krizë financiare serioze, situatë që është pranuar edhe nga drejtoresha e re, Eni Vasili, vetëm pak muaj pas marrjes së detyrës. Në një komunikim të brendshëm me departamentet financiare të RTSH-së, Vasili ka ngritur alarmin për situatën kritike që kërcënon seriozisht pagesat ndaj punonjësve dhe kontraktorëve të jashtëm.
Situata e rënduar pason një periudhë të trazuar në drejtimin e institucionit, me shkarkimin e ish-drejtorit Alfred Peza, rënien e Këshillit Drejtues dhe emërimin e një drejtueseje të përkohshme. Ky zhvillim reflekton menaxhim të pakontrolluar dhe keqadministrim të thellë, që ka çuar në boshatisjen e fondit të televizionit publik.
Sipas dokumenteve të dërguara Ministrisë së Financave, RTSH-ja ka humbur mbi 730 mijë euro deri më 31 maj vetëm nga proceset gjyqësore të hapura nga punonjës të larguar në mënyrë të paligjshme. Duke marrë parasysh edhe proceset në vazhdim, rreziku financiar arrin mbi 4 milionë euro. Një tjetër humbje e madhe vjen nga kontratat për të drejtat televizive, të cilat sipas auditimeve të brendshme kanë shkaktuar dëme rreth 4 milionë euro, ku gjysma janë shpenzime jashtë buxhetit vjetor.
Në total, dëmi financiar nga menaxhimi i mëparshëm kap shifrën mbi 8 milionë euro, që përbën rreth një të tretën e buxhetit vjetor të RTSH-së. Ky buxhet financon aktivitetin e transmetuesit publik me rreth 25 milionë euro nga taksat e qytetarëve dhe buxheti i shtetit.
Përballë kësaj situate alarmante, Eni Vasili ka njoftuar se për vitin 2025 nuk do të kërkojë fonde shtesë pa kryer një auditim të plotë të strukturës dhe projekteve të RTSH-së. Kjo është sipas saj mënyra e vetme për të zbuluar destinacionin e fondeve publike dhe për të rivendosur besimin e publikut në televizionin shtetëror.
Ajo ka theksuar se një pjesë e krizës lidhet edhe me realizimin e të ardhurave më të ulëta seç është parashikuar, çka tregon jo vetëm dobësi në menaxhim, por edhe mungesë transparence dhe përgjegjshmërie gjatë viteve të fundit.
