Shpërthimi i vullkanit Krasheninnikov në Gadishullin Kamchatka erdhi pas një tërmeti të fuqishëm 8.8 ballë, duke dërguar një re hiri 6,000 metra në ajër dhe duke rikthyer aktivitetin vullkanik në Rusinë Lindore.
Vullkani Krasheninnikov, i vendosur në Gadishullin Kamchatka të Rusisë, ka regjistruar shpërthimin e tij të parë në më shumë se pesë shekuj, pas tërmetit të fuqishëm 8.8 ballë që tronditi zonën. Autoritetet lokale raportuan se ngjarja ndodhi në orën 4:50 të mëngjesit të dielën, kur një shtyllë hiri u ngrit në lartësi prej 6,000 metrash nga maja e vullkanit, që është 1,856 metra i lartë.
Olga Girina, drejtuese e Ekipit të Reagimit ndaj Shpërthimeve Vullkanike të Kamchatka-s (KVERT), konfirmoi se ky është shpërthimi i parë historik i Krasheninnikov në 600 vjet. Ajo njoftoi se po formohet një kupolë lave në shpatin e vullkanit, ndërsa nga krateri verior po dalin gazra të forta me avull dhe një re hiri që vazhdon të ngrihet pa ndërprerje.
I emëruar pas eksploruesit Stepan Krasheninnikov, ky vullkan përbëhet nga dy stratovulkane brenda një kaldere të madhe në Rezervatin Natyror Kronotsky, afërsisht 50 kilometra larg qytetit Petropavlovsk-Kamchatsky. Derdhja e fundit e lavës daton rreth vitit 1463, ndërsa aktiviteti fumarolik u evidentua vetëm në vitin 1963, pa shpërthime të dokumentuara më parë.
Shpërthimi i fundit u pasua nga një tërmet masiv 8.8 ballë më 30 korrik në juglindje të Petropavlovsk-Kamchatsky, që shkaktoi alarme cunami dhe evakuime të shumta në rajon. Pak kohë më vonë, vullkani Klyuchevskaya Sopka shpërtheu në një ngjarje që autoritetet e cilësuan si më e fuqishmja në 70 vitet e fundit.
Gjithashtu, vullkane të tjerë në rajon, si Shiveluch, Karymsky, Bezymianny dhe Kambalny, kanë shfaqur aktivitet të shtuar, duke ngritur rrezikun që retë e hirit të arrijnë deri në 10,000 metra lartësi. Për këtë arsye, autoritetet kanë këshilluar banorët dhe turistët të shmangin zonat aktive, duke mbajtur një distancë minimale prej 10 kilometrash nga vullkanet me aktivitet.
