Fitimi i inceneratorit të Sharrës u rrit ndjeshëm në 2024-n, por qytetarët paguajnë borxhet e privatit të mëparshëm pa marrë investime në këmbim.
Vitin e kaluar, kompania Integrated Energy, që menaxhon inceneratorin e Tiranës, regjistroi një fitim para taksave prej 10.3 milionë eurosh, duke shënuar një rritje prej 36% krahasuar me vitin 2023, kur fitimi ishte 7.6 milionë euro. Kjo sipas bilancit të dorëzuar në Qendrën Kombëtare të Biznesit për vitin 2024.
Në raportin e administrimit, të ardhurat nga landfilli i Sharrës u rritën me 8.4%, duke arritur në 17.4 milionë euro. Kjo do të thotë se kompania operon me një normë fitimi prej 60% mbi xhiron. Ky tregues tregon qartë se biznesi i Sharrës është shumë fitimprurës dhe qytetarët shqiptarë po paguajnë një tarifë prej 29 euro për depozitimin e mbetjeve, pa përfituar asnjë investim real nga kompania.
Nga ana tjetër, shpenzimet operative të kompanisë u ulën me 17%, duke zbritur në 6.8 milionë euro gjatë vitit të kaluar. Kjo ulje e kostove përkthehet në përmirësim të performancës financiare.
Një tjetër indikator pozitiv është edhe ulja e llogarive të arkëtueshme nga klientët, të cilat ranë nga 15.1 milionë euro në 11.9 milionë euro. Kjo tregon se Integrated Energy ka arritur të mbledhë më shumë se 3 milionë euro borxhe të papaguara nga klientët e saj në vitin 2024.
Fitimet dhe menaxhimi i mirë financiar kanë lejuar kompaninë të fillojë shlyerjen e borxheve të trashëguara nga periudha e administrimit privat. Sipas raportit, detyrimet ndaj furnitorëve u ulën me mbi 400 mijë euro, duke rënë në 6.2 milionë euro. Gjithashtu, kompania shlyeu mbi 1.4 milionë euro kredi të trashëguara nga koha kur ishin në pronësi private.
Megjithatë, Integrated Energy ka ende për të shlyer kredi në vlerë prej 7.7 milionë eurosh, të marra nga banka të nivelit të dytë gjatë periudhës së menaxhimit nga dyshja Zoto-Mërtiri.
Përveç kredive, kompania ka paguar edhe 3.5 milionë euro detyrime të prapambetura ndaj Tatimeve gjatë vitit 2024, gjithashtu të trashëguara nga administrimi privat. Sipas dokumenteve zyrtare, ende mbeten 2.2 milionë euro borxhe për taksa të papaguara në periudhën e menaxhimit privat.
Në thelb, qytetarët e Tiranës janë duke paguar jo vetëm tarifën për shërbimin, por edhe borxhet e lëna nga administrimi privat i landfillit të Sharrës. Përveç kësaj, do të duhet të përballojnë edhe rreth 10 milionë euro të tjera borxhe për t’i shlyer plotësisht këto detyrime të prapambetura.
Që nga gushti i vitit 2023, Integrated Energy është nën administrim shtetëror, pas sekuestrimit të saj nga Gjykata për akuzat e korrupsionit. Aktualisht, fati i kompanisë mbetet i paqartë, ndërkohë që administratori shtetëror vetëm menaxhon operacionet, shlyen borxhet dhe përqendron fitimet në llogarinë e fitimeve të pashpërndara.
