Kërkesa nga blerësit e huaj ka ngjitur çmimet e apartamenteve bregdetare në zonat më të njohura, duke rritur çmimet mesatarisht me 20 deri në 67 për qind gjatë vitit 2025.
Në zonat bregdetare nga Golemi në Qerret, Vlorë, Rradhimë, Orikum e deri në Sarandë, kërkesa për pasuri të paluajtshme vijon të dominohet nga shtetas të huaj, kryesisht nga vendet europiane pa dalje në det, si Çekia, Polonia dhe Hungaria. Rreth 90% e shitjeve në këto zona bëhen nga blerës të huaj. Më së shumti kërkohen apartamente tip 1+1 dhe 2+1, me vlera nga 80 mijë deri në 300 mijë euro.
Pjesa më e madhe e blerësve të huaj përdorin këto prona për disa javë pushime në vit, ndërsa pjesën tjetër të kohës i japin me qira për turistë, duke kthyer investimin në fitim. Kjo situatë ka çuar në një rritje të ndjeshme të çmimeve, duke nxitur një treg aktiv dhe dinamik, sidomos gjatë vitit 2025.
Në Vlorë, shtrenjtimet më të theksuara janë vërejtur në zonat e Lungomares, Rradhimës dhe Orikumit. Në Lungomare, çmimet e apartamenteve në vijën e dytë të ndërtimit u rritën nga 1,500 euro për metër katror në vitin 2024 në 2,000-2,500 euro në 2025, ndërsa në vijën e parë arritën deri në 3,500 euro për metër katror për shkak të kërkesës së madhe dhe ofertës së kufizuar.
Zona e Rradhimës ka pësuar një zhvillim të qëndrueshëm me projekte rezidenciale të reja, ku çmimet e shitjes janë rritur me 20 deri në 33 për qind. Ndërkohë, në Orikum çmimet për apartamentet më ekonomike u rritën nga 800 në 1,300 euro për metër katror, ndërsa çmimet maksimale mbeten në 1,500 euro.
Në Sarandë, gjithashtu kërkesa e të huajve ka rritur çmimet në vitin 2025, me oferta për apartamente pranë detit që shkojnë nga 2,000 deri në 3,500 euro për metër katror, dhe deri në 4,000 euro në resorte të veçanta. Megjithatë, sipas agjentëve, kërkesa ka nisur të bjerë që prej vitit 2024, duke shënuar një tkurrje prej 30% në 2025 dhe deri në 50% në vitin paraardhës.
Në Golem, kërkesa për apartamente vijon të kryesohet nga shtetas çekë, polakë dhe hungarezë, kryesisht për investim dhe qira ditore. Çmimet në vijën e parë të ndërtimit u rritën me 33%, duke arritur në 2,000 euro për metër katror, ndërsa në zonën e “Shkëmbit të Kavajës” çmimet u rritën me 11%.
Edhe në Qerret, çmimet kanë vijuar të rriten me deri në 40% gjatë vitit 2025, kryesisht për shkak të kërkesës së lartë nga të huajt, të cilët blejnë kryesisht shtëpi pushimi dhe prona për investim. Për më tepër, zhvillimet e reja urbanistike me rezidenca 5 deri në 7 katëshe, të pajisura me pishina dhe zona gjelbëruese, kanë përmirësuar ofertën në treg.
Sipas ekspertëve, për shkak të kërkesës së vazhdueshme nga blerësit e huaj, pritet që çmimet në këto zona të rriten me 20 deri në 30 për qind në vitet e ardhshme. Ndërkohë, blerësit vendas mbeten të fokusuar në prona me çmime më të ulëta, sidomos në zonat urbane dhe me oferta më ekonomike.
