Sektori i hotelerisë me marka të njohura ndërkombëtare po udhëheq investimet me 65% të projekteve në kategori me 5 yje, duke ndryshuar turizmin vendas.
Investimet në struktura akomoduese me emra ndërkombëtarë në Shqipëri kanë arritur vlerën e 792 milionë eurove, sipas dokumentit zyrtar të strategjisë së turizmit 2024-2030, miratuar së fundmi nga qeveria. Këto shifra tregojnë ndikimin e paketave nxitëse dhe bashkëpunimeve me markat globale, të cilat kanë nxitur zhvillimin e këtij sektori me potencial të madh.
Paketa e vitit 2018 për nxitjen e investimeve në hotele me katër dhe pesë yje ka tërhequr disa prej emrave më të mëdhenj të industrisë, duke sjellë investime të drejtpërdrejta dhe bashkëpunime të ngushta mes partnerëve vendas dhe markave të njohura ndërkombëtare. Këto marrëveshje përfshijnë përdorimin e markës kundrejt pagesës dhe përmbushjen e standardeve të larta të cilësisë.
Sipas strategjisë, hotelet me markën Melia kryesojnë për nga numri i dhomave të planifikuara, me 669 të tilla, të ndjekura nga Accor me 616 dhoma dhe Hyatt me 447 dhoma. Kur flasim për investimin mesatar për dhomë, Marriott renditet i pari me 322,581 euro për dhomë, pasuar nga Hilton dhe Melia.
Nga investimet totale, Accor mban vendin e parë me 122 milionë euro, Marriott ndjek me 100 milionë euro, dhe Melia me 82 milionë euro. Nga gjithsej 792 milionë euro investime, 65% i përkasin hoteleve me 5 yje, ndërsa 35% investimeve janë për hotelet me 4 yje.
Strategjia e re e turizmit grupon Shqipërinë në gjashtë klastera turistike, duke përfshirë bregdetin Adriatik, rajonet veriore dhe jugore të brendshme, zonën e Tiranës, zonën qendrore dhe bregdetin e Jonit. Qëllimi është të zhvillohen produktet dhe infrastrukturat turistike në mënyrë të harmonizuar dhe të qëndrueshme.
Në aspektin e menaxhimit të plazheve, strategjia parashikon klasifikimin dhe tematizimin e tyre, një menaxhim më të zgjeruar rajonal dhe rikthimin në fokus të koncesioneve, që mund të përfshijnë edhe shërbime mbështetëse të lidhura me turizmin.
Një tjetër çështje e rëndësishme është zhvillimi i bregdetit, ku në të kaluarën janë dhënë leje për fshatra turistikë kryesisht me qëllim rezidencat. Strategjia thekson nevojën për stimuj të rinj që mbështesin zhvillimin e projekteve të përziera, duke thjeshtuar procesin e investimeve dhe përmirësuar qëndrueshmërinë e këtij sektori me fokus në hotele, rezidenca me markë dhe ato pa markë.
Kjo qasje synon të forcojë sektorin turistik duke promovuar investime profesionale dhe të balancuara, duke pasur parasysh kushtet aktuale të tregut dhe nevojat për zhvillim afatgjatë.
