Prokuroria e Tiranës ka shpallur ditën e djeshme pretencën për ngjarjen e dhunës që ndodhi në Pallatin Mbretëror mes Princ Leka Zogut, ish-bashkëshortes së tij, Elia Zaharias dhe babait të saj, Gjergj Zaharia.
Në këtë rast, organi i akuzës ka kërkuar shpalljen fajtor të Princ Lekës, duke kërkuar një dënim me 1 vit e 6 muaj burgim. Po ashtu, janë kërkuar dënime më të lehta për dy të tjerët, me Elia Zaharian e cila akuzohet për dhunë në familje të kërkohet një dënim me 6 muaj burg, ndërsa për babain e saj, Gjergj Zaharia, një dënim me 1 vit burg.
Nëse ata shpallen fajtorë nga Gjykata, të tre do të përfitojnë një dënim të konvertuar në shërbim prove, duke shmangur kështu vuajtjen e dënimit me burg. Të akuzuarit janë gjykuar me procedurën e gjykimit të shkurtuar, dhe seanca e radhës për shpalljen e vendimit është caktuar për më 13 dhjetor. Vendimi do të jepet nga gjyqtarja Migena Laska.
Elia Zaharia, e cila ka preferuar të mbajë një qëndrim të qetë dhe pa komentuar në lidhje me rastin, ka thënë se është e angazhuar me aktivitete kulturore, si Panairi i Librit, dhe se e respekton procesin gjyqësor. “Nuk kam asnjë koment për vendimin, pasi çështja është ende në gjykim dhe e respektoj procesin gjyqësor në heshtje,” tha ajo për mediat.
