Shqipëria përfshihet mes destinacioneve më të përballueshme në Europë për pushime me çmime të arsyeshme dhe përvoja të pasura kulturore
Europa njihet shpesh si një kontinent i shtrenjtë për turistët, për shkak të kostove të larta të hoteleve, ushqimit dhe atraksioneve.
Shqipëria ofron një alternativë të mrekullueshme për pushime buzë detit pa shpenzime marramendëse. Riviera shqiptare, me plazhet e saj të kristalta, qytetet historike dhe peizazhet malore mbresëlënëse, krahasohet me destinacionet e njohura të Greqisë, por me çmime dukshëm më të ulëta. Ushqimi tradicional, akomodimi dhe transporti janë ndër më të përballueshmit në rajon, duke e bërë vendin tonë një destinacion gjithnjë e më të kërkuar nga vizitorët e huaj.
Në listën e destinacioneve me çmime të arsyeshme përfshihet edhe Bullgaria. Ky vend ballkanik ofron përvoja të ndryshme nga plazhet në Detin e Zi, deri te skijimi në zonat malore. Sofja, kryeqyteti, kombinon trashëgiminë historike me një jetë nate të gjallë, ndërsa ushqimi dhe transporti janë të lirë dhe të aksesueshëm.
Rumania, një tjetër vend i përfshirë në listë, ofron eksperienca të pasura kulturore me çmime të ulëta. Bukureshti është epiqendra e gjallërisë urbane, ndërsa trenat e brendshëm lejojnë eksplorimin e kështjellave, fshatrave dhe maleve, pa dëmtuar kuletën e vizitorëve.
Hungaria, dhe në veçanti Budapesti, vazhdon të jetë një destinacion popullor për udhëtarët me çanta shpine. Banjat termale, ndërtesat historike dhe skenat e natës i japin qytetit një hijeshi të veçantë, ndërsa shpenzimet për një vakt apo spa janë shumë më të ulëta se në vendet e tjera perëndimore.
Polonia, me qytete si Varshava dhe Krakov, ofron një ndërthurje mes historisë, modernitetit dhe buxhetit të arsyeshëm. Atraksionet si kampi i Aushvicit dhe miniera e kripës Wieliczka janë të hapura për turistët me tarifa të përballueshme.
Bosnja dhe Hercegovina është një tjetër perlë e padukshme e kontinentit. Qytete si Sarajeva dhe Mostari mahnitin me arkitekturë orientale dhe atmosferë autentike. Akomodimi dhe ushqimi kushtojnë shumë pak, ndërsa mikpritja lokale mbetet një nga pikat më të forta të këtij destinacioni.
Edhe pse më pranë çmimeve perëndimore, Portugalia qëndron në listë për shkak të balancës që ofron mes cilësisë dhe kostos. Lisbona dhe Porto janë qytete ku mund të shijosh jetën urbane dhe kuzhinën tradicionale pa kosto të larta, ndërsa transporti publik është i besueshëm dhe ekonomik.
