Tirana dhe Athina renditen mes qyteteve më të prekura nga nxehtësia ekstreme, me mbi 140 ditë përvëluese çdo vit sipas studimeve të reja
Një valë përvëluese ka përfshirë Evropën këtë të diel, me temperatura që në Shqipëri kanë arritur deri në 43.9°C, sipas gazetarit Ndriçim Gjoshi, duke vendosur një tjetër rekord për korrikun. Ekspertët paralajmërojnë se vala e të nxehtit do të vijojë edhe në javët në vazhdim, duke rritur rrezikun për shëndetin dhe infrastrukturën.
Stina e verës, dikur e kufizuar në tre muaj, po zgjerohet ndjeshëm në shumë pjesë të kontinentit. Studimet më të fundit tregojnë se periudha me temperatura të larta po zgjat deri në pesë muaj në disa qytete, duke shndërruar të nxehtin në një realitet të zgjatur dhe të përhershëm.
Raporti i publikuar nga organizata ndërkombëtare “Climate Resilience for All” rendit Tiranën dhe Athinën ndër qytetet më të goditura nga nxehtësia ekstreme. Athina përjeton mesatarisht 145 ditë në vit me temperatura mbi 32°C, ndërsa Tirana ndjek me 143 ditë të tilla, duke lënë pas qytete si Lisbona me 136 ditë dhe Madridi me 119.
Në këtë listë përfshihet edhe Parisi, ku vera tashmë zgjat nga mesi i qershorit deri në shtator. Temperaturat që shpesh kalojnë kufirin e sigurisë përbëjnë një rrezik të drejtpërdrejtë për popullatën, sidomos për të moshuarit dhe personat me sëmundje kronike.
Sipas të dhënave të World Weather Attribution, mbi katër miliardë njerëz në mbarë botën kanë qenë të ekspozuar ndaj ditëve me vapë ekstreme gjatë vitit të fundit. Ndër faktorët kryesorë për këtë përkeqësim përmendet fenomeni i “ishullit të nxehtësisë urbane”, ku strukturat urbane rrisin ndjeshëm temperaturat në krahasim me zonat përreth.
“Qytetet nuk janë ndërtuar për të përballuar këto temperatura ekstreme. Ato përballen me goditje të reja klimatike që ndikojnë drejtpërdrejt në shëndetin dhe infrastrukturën”, deklaron Kathy Baughman McLeod, drejtuese e analizës.
Përballë kësaj krize klimatike, ekspertët kërkojnë veprime të menjëhershme nga autoritetet vendore dhe qeveritë. Investimet në sipërfaqe të gjelbra, sisteme paralajmërimi dhe zgjidhje arkitektonike që ofrojnë hije, konsiderohen thelbësore për mbrojtjen e qytetarëve.
Në përfundim, specialistët e klimës theksojnë se koha kur vala e të nxehtit konsiderohej një dukuri sezonale ka përfunduar. Sfida e mbrojtjes ndaj nxehtësisë është tashmë një betejë e përditshme për qytetet evropiane dhe për shëndetin publik.
