Kompania Romiri Sh.p.k në fshatin Mizë, Divjakë, mbetet ndër liderët e padiskutueshëm në eksportin e prodhimeve bujqësore të kësaj zone.
Sezoni veror ka sjellë një tjetër valë të begatë për bujqësinë në Divjakë, një nga zonat më pjellore në Shqipëri për prodhimin e shalqirit dhe kulturave të bustanit, raporton gazetari Ndriçim Gjoshi. Në veçanti, fushat e fshatrave Mizë dhe Zharnec kanë dhënë rendimente të larta falë përkushtimit të fermerëve dhe kushteve të favorshme klimatike.
Në këtë kontekst, kompania Romiri Sh.p.k është kthyer në një pikë kyçe për grumbullimin dhe eksportin e prodhimeve. TV Apollon vizitoi njërën nga këto pika grumbullimi në fshatin Mizë, ku u takua me Romir Hasën. Në intervistën e dhënë, ai theksoi se ky sezon ka qenë i suksesshëm për fermerët dhe se prodhimi ka qenë i bollshëm dhe me cilësi të lartë.
Eksportet e shalqirit kanë nisur zyrtarisht më 5 qershor, dhe deri më tani janë eksportuar mbi 300 kamionë, që përkthehen në rreth 6 mijë tonë produkt. Prodhimi i kësaj zone, që zë më shumë se 100 hektarë, është dërguar drejt tregjeve të Kosovës, Bosnje-Hercegovinës, Serbisë dhe Polonisë.
Çmimet për kilogram kanë ndryshuar sipas ritmeve të tregut, duke filluar nga 35 lek për kilogram në fillim të sezonit dhe duke zbritur në 10 lek për kilogram aktualisht. Megjithatë, prodhimi mbetet i kontrolluar dhe pa abuzime me pesticide, duke ruajtur standardet e sigurisë ushqimore për eksport.
Romiri Sh.p.k është tashmë një emër i konsoliduar jo vetëm në tregun vendas, por edhe në atë ndërkombëtar. Partneriteti i saj me fermerët e zonës ka sjellë zhvillim të qëndrueshëm dhe është një model suksesi për agrobiznesin shqiptar. Raporton Ndriçim Gjoshi.
