Prokuroria e Fierit: 9 të ndaluar dhe 5 të shpallur në kërkim për mashtrime me TVSH-në, pastrim parash dhe shpërdorim detyre
Një hetim i thelluar që ka zgjatur më shumë se gjashtë muaj ka çuar në zbardhjen e një skeme të dyshuar mashtrimi me përmasa të mëdha financiare nga kompania “Bankers Petroleum Albania Ltd”. Prokuroria e Fierit njoftoi zyrtarisht zbatimin e 14 masave sigurimi për disa drejtues dhe ish-drejtues të kompanisë, të përfshirë në veprimtari të paligjshme që lidhen me shmangien e taksave dhe pastrimin e parave.
Hetimet nisën më 30 dhjetor 2024, pas referimit nga Drejtoria e Hetimit Tatimor. Sipas Prokurorisë, kompania akuzohet për krijimin e skemave mashtruese mbi TVSH-në, fshehje të të ardhurave, pastrim parash, shpërdorim detyre dhe moskryerje të detyrave nga organet tatimore.
Gjatë kontrolleve të zhvilluara në ambientet e kompanisë dhe në disa banesa private, u sekuestruan prova materiale dhe u ndaluan 9 persona, përfshirë administratorin aktual H.X, ish-administratorin L.Ç dhe disa drejtues të tjerë. Ndërkohë, pesë persona, kryesisht të huaj, janë shpallur në kërkim. Prokuroria nënvizoi se ndërhyrja në këtë fazë u bë për të shmangur prishjen e provave dhe ndalimin e aktivitetit kriminal.
Sipas të dhënave hetimore, kompania ka deklaruar vazhdimisht humbje që nga viti 2004 deri më 2024, duke i shkaktuar shtetit shqiptar humbje të konsiderueshme. Edhe pse ka realizuar shitje dhe eksporte në vlerë prej mbi 532 miliardë lekësh, nuk ka paguar asnjë tatim mbi fitimin, por ka përfituar rimbursime të mëdha të TVSH-së.
Skema e dyshuar përfshinte rritje fiktive të shpenzimeve për të shmangur tatimet, ndërsa janë identifikuar edhe kompani dhe individë bashkëpunëtorë që ndihmonin në fshehjen e të ardhurave. Në shumë raste dyshohet se janë falsifikuar dokumente dhe janë kryer operacione financiare të ndërlikuara brenda dhe jashtë vendit.
Shuma e dëmit të shkaktuar ndaj buxhetit të shtetit, sipas Prokurorisë, kap vlerën e miliona eurove. Hetimet po zgjerojnë rrethin e të implikuarve dhe po analizohen skema të tjera të mundshme mashtrimi.
Prokuroria e Fierit ka konfirmuar se do të vijojë me vendosmëri ndjekjen penale të të gjithë personave të përfshirë në këtë aferë financiare, duke theksuar rëndësinë e mbrojtjes së interesave publike dhe financiare të shtetit.
Sqarim zyrtar: Çdo person i përfshirë konsiderohet i pafajshëm derisa fajësia e tij të provohet me vendim gjyqësor të formës së prerë.
