Një operacion i kombinuar po zhvillohet në zyrat e Bankers Petroleum në Fier, mes dyshimeve për borxhe fiskale dhe probleme mjedisore në aktivitetin e kompanisë
Lëvizje intensive janë vërejtur këtë mëngjes në ambientet e zyrave të Bankers Petroleum, kompania që operon në fushat naftëmbajtëse të Marinzës, në qarkun e Fierit. Disa automjete të Tatimeve dhe furgonë policie kanë mbërritur pranë godinës qendrore të kompanisë, ndërsa persona me dokumente në duar janë parë duke hyrë dhe dalë nga godina.
Deri në këto momente, nuk ka një reagim zyrtar nga Bankers Petroleum lidhur me natyrën e këtij kontrolli. Burime konfidenciale bëjnë me dije se ndërhyrja mund të jetë rezultat i një detyrimi financiar të papaguar që kompania i ka shtetit shqiptar.
Bankers është përballur edhe më parë me akuza nga Drejtoria e Tatimeve, për mospagesë të plotë të detyrimeve fiskale, çështje që ka qenë pjesë e debatit publik për marrëdhënien e kompanive të mëdha të huaja me sistemin tatimor vendas.
Përveç aspektit financiar, kompania është kritikuar vazhdimisht për ndotjen mjedisore që shkakton në zonën përreth, për shkak të aktivitetit të saj të nxjerrjes së naftës. Banorë dhe aktivistë lokalë kanë denoncuar në vijimësi ndotjen e tokës dhe ajrit, duke akuzuar Bankers për mosrespektim të standardeve mjedisore ndërkombëtare.
Zhvillimet e fundit pritet të shoqërohen me një sqarim publik nga autoritetet përkatëse, ndërsa vëmendja është përqendruar te transparenca që do të japë kompania për situatën aktuale.
Operacioni vjen në një kohë kur autoritetet fiskale po ashpërsojnë masat ndaj subjekteve me borxhe të papaguara, veçanërisht ndaj atyre që operojnë në sektorë strategjikë si energjia dhe nafta. Rasti i Bankers mund të jetë sinjali i parë i një fushate më të gjerë kontrollesh ndaj kompanive me ndikim të madh ekonomik e mjedisor.
