Me mbi 230 hektarë të mbjella me livando në Dotirë e Kushovë, Gramshi përfiton të ardhura nga eksportet në dhjetëra vende
Qyteti i Gramshit po përjeton një rilindje ekonomike falë kultivimit të bimës medicinale dhe aromatike të livandos. Kjo kulturë e njohur për bukurinë, erën e këndshme dhe vetitë shëruese është kthyer në një burim të qëndrueshëm të ardhurash për banorët e zonës. Aktualisht, në njësitë administrative të Dotirës dhe Kushovës janë mbjellë mbi 230 hektarë me livando.
Kultivimi i livandos nuk është vetëm një investim bujqësor, por një sektor që ka arritur të ndikojë ndjeshëm në jetën ekonomike të qindra familjeve. Bima eksportohet në 16 shtete të ndryshme, duke përfshirë tregje evropiane dhe më gjerë, dhe konsiderohet tashmë një nga produktet kryesore të zonës.
Livandoja nuk është një bimë e re për banorët e Gramshit. Në kohën e monizmit, çdo familje mbante në oborrin e saj këtë bimë, e cila besohej se mbronte shtëpinë nga gjarpërinjtë dhe insektet. Me kalimin e kohës, ky zakon është shndërruar në një industri të vërtetë.
Aromat dhe ngjyrat e livandos janë kthyer në një simbol të qytetit, ndërsa Gramshi po afirmohet gjithnjë e më shumë si një destinacion për prodhime bio dhe aktivitete natyrore. Bashkia ka bërë thirrje për më shumë mbështetje ndaj fermerëve që merren me kultivimin e kësaj bime, për të shtuar sipërfaqet e mbjella dhe për të zgjeruar tregjet.
Me potencial të lartë eksporti dhe përdorim të gjerë në industrinë kozmetike, ushqimore dhe farmaceutike, livandoja është sot një pasuri e vërtetë për Gramshin. Për banorët, ajo nuk është më thjesht një lule dekorative, por një mënyrë për të siguruar jetesën dhe për të ndërtuar të ardhmen në vendlindje.
