Presidenti serb konfirmon pezullimin e eksporteve ushtarake, duke përjashtuar çdo përfshirje në konfliktin Izrael-Iran
Presidenti i Serbisë, Aleksandar Vuçiç, deklaroi më 23 qershor se vendi i tij ka ndalur të gjitha eksportet e armëve dhe municioneve, në një moment të tensionuar të konfliktit mes Izraelit dhe Iranit. Sipas Vuçiçit, Serbia nuk ka më asnjë aktivitet eksporti në këtë fushë dhe i gjithë prodhimi aktual dërgohet vetëm për nevojat e ushtrisë serbe.
“Nuk po eksportojmë më asgjë. Çdo gjë është ndalur. Nëse do të ketë ndonjë përjashtim në të ardhmen, do të nevojiten vendime të veçanta nga autoritetet më të larta shtetërore,” theksoi presidenti, duke u përgjigjur pyetjeve lidhur me raportimet për dërgesa municionesh drejt Izraelit.
Deklaratat e Vuçiçit vijnë pas mbledhjes së kolegjiumit të zgjeruar të Shtabit të Përgjithshëm të Ushtrisë Serbe, ku ai sqaroi se në të kaluarën, pas sulmit të Hamasit më 7 tetor 2023, Serbia kishte lejuar eksportin e municioneve për Izraelin. Por tani, sipas tij, rrethanat kanë ndryshuar dhe vendimi për ndalim është përfundimtar.
Kreu i shtetit serb mbrojti qëndrimin e tij, duke thënë se vepron duke pasur në fokus sigurinë kombëtare, por njëkohësisht edhe mbrojtjen e vendeve të punës në industrinë serbe të mbrojtjes, ku prodhohen armët dhe municionet që më parë eksportoheshin.
Konflikti mes Izraelit dhe Iranit u përshkallëzua më 13 qershor, kur forcat izraelite ndërmorën sulme të drejtpërdrejta ndaj disa objektivave strategjike në Teheran, përfshirë baza ushtarake, qendra kërkimore bërthamore dhe lagje të populluara. Si pasojë, humbën jetën komandantë të Gardës Revolucionare Islamike, shkencëtarë dhe civilë.
Përgjigja e Iranit ishte e menjëhershme: dronë dhe raketa balistike u lëshuan ndaj bazave ajrore dhe instalacioneve ushtarake në territorin izraelit. Situata u ndërlikua më tej më 22 qershor, kur presidenti amerikan Donald Trump konfirmoi përfshirjen e SHBA-së përmes goditjeve ajrore mbi tre objekte bërthamore iraniane.
Sipas të dhënave të fundit të publikuara nga Ministria e Shëndetësisë së Iranit, numri i viktimave nga sulmet izraelite ka arritur në të paktën 430, përfshirë civilë dhe pjesëtarë të forcave ushtarake.
