Federata serbe e futbollit ka zyrtarizuar se ndeshja mes Serbisë dhe Shqipërisë për kualifikueset e Kampionatit Botëror do të zhvillohet më 11 tetor në stadiumin “Rajko Mitić” në Beograd, duke i dhënë fund të gjitha dilemave për vendin e përballjes së shumëpritur.
Ndeshja Serbi-Shqipëri pritet të jetë një nga takimet më të nxehta të fazës kualifikuese, ndërsa stadiumi “Rajko Mitić” do të jetë arena që do të presë këtë duel ballkanik më 11 tetor. Kjo është bërë zyrtare nga vetë Federata e Futbollit të Serbisë, pas konsultimeve me UEFA-n dhe pas një analize të plotë për sigurinë dhe organizimin.
Në stadiumin “Rajko Mitić”, i cili është shtëpia e Crvena Zvezdës, janë zhvilluar edhe ndeshje të tjera me rëndësi të lartë, ndërsa tifozët presin me padurim këtë përballje. Rikujtojmë që 11 vite më parë, dy përfaqësueset u përballën në një tjetër arenë të Beogradit, atë të Partizanit.
Në njoftimin zyrtar të federatës serbe theksohet se, krahas vlerësimit sportiv, është marrë parasysh edhe aspekti i sigurisë. Sipas tyre, stadiumi “Rajko Mitić” ofron kushtet më të mira për zhvillimin e ndeshjeve të rëndësishme të Serbisë, jo vetëm ndaj Shqipërisë, por edhe ndaj Anglisë.
Përballja ndaj Shqipërisë është planifikuar të zhvillohet më 11 tetor, ndërsa ndeshja me Anglinë do të luhet më 9 shtator, po në të njëjtin stadium. Sa i përket sfidës së fundit në grup, kundër Letonisë, ajo do të luhet në stadiumin “Duboçica” të Leskovacit.
Zgjedhja e “Rajko Mitić” vjen pas një vlerësimi të plotë për kapacitetin dhe sigurinë, duke u konsideruar si objekti më i madh futbollistik në Serbi, ku garantohen kushte optimale për skuadrën dhe spektatorët. Autoritetet janë të angazhuara maksimalisht për të ofruar një event të sigurt dhe në nivelin e duhur ndërkombëtar.
Ky vendim është përshëndetur edhe nga tifozët, të cilët shpresojnë për një ndeshje të bukur dhe pa incidente, ku sporti të jetë në qendër të vëmendjes. Stadiumi legjendar i Beogradit është gati të mirëpresë derbin ballkanik që pritet me shumë interes.
