Nis edicioni i 15-të i festivalit mbarëkombëtar të aktrimit “Apollon”.

Sonte në Fier, në teatrin “Bylis” nis edicioni i 15-të i festivalit mbarëkombëtar të aktrimit “Apollon”.

I kthyer në traditë të bukur kulturore dhe i rritur nga viti në vit artistikisht, ky festival do të jetë destinacioni kryesor i artistëve të jashtëzakonshëm të skenës së trojeve mbarëshqiptare.

I kthyer në një nga ngjarjet më të rëndësishme kulturore për Fierin, për 8 ditë dhe 7 netë, festivali mbarëkombëtar i aktrimit do të jetë kryefjala e ditës ku arti skenik do të flasë përmes emrave më të spikatur të teatrit për të gjithë artdashësit fierakë.

Kryetari i bashkisë, Armando Subashi, është shprehur se salla e teatrit “Bylis” do të buçasë nga duartrokitjet e spektatorëve dhe qyteti do të përjetojë gjallërinë dhe bukurinë që di të falë vetëm teatri.

Gjithashtu, zoti Subashi është shprehur se festivali i aktrimit “Apollon” është finalizimi i projektit “PËR TEATRIN”, i cili është nisur në muajin shkurt të këtij viti dhe përfundon në fund të nëntorit.

Përmes një thirrjeje publike, ne ftuam produksionet më të mira teatrore në vend, të cilat u përzgjodhën nga një juri prestigjioze e kryesuar nga artistët e mirënjohur: Luiza Xhuvani, Ndriçim Xhepa, Agim Bajko dhe Milto Kutali.

Në këtë festival vijnë 5 shfaqje teatrore nga më të mirat, produksione të teatrove të Durrësit, Tiranës, Prishtinës dhe atyre private, si dhe 2 premiera nga produksionet e teatrit “Bylis”.

Ka thënë në vijim kreu i organit ekzekutiv të bashkisë Fier, zoti Subashi.

Për 7 netë, në këtë skenë do të interpretojnë 30 artistë, nga më të mirënjohurit e artit skenik, duke nisur nga: Yllka Mujo, Luiza Xhuvani, Olta Daku, Myzafer Zifla, Gazmend Gjoka, Zamira Kita e të tjerë, për të përfunduar me aktorët më të rinj Gaz Paja, Astjani Shehaj, Anri Celibashi etj.

Festivali mbarëkombëtar në Fier do të sjellë edhe regjisorët më të mirë të kohës siç janë Draida Dervishi, Besnik Bisha, Altin Basha, Armando Bora etj.

Zoti Subashi ka theksuar se ky festival i dedikohet aktorit dhe për këtë vit janë shtuar jo vetëm vëmendja por edhe çmimet, siç janë:

1. Dy çmime të mëdha për aktorin ose aktoren më të mirë.
2. Dy çmime për aktorin ose aktoren më të mirë protagonist.
3. Dy çmime “In Memorium” për dy artistët më simbol të këtij teatri: Fatos Sela & Hajrie Rondo.
4. Dy çmime karriere të cilat do të jepen nga juria e festivalit që kryesohet nga emra si Luiza Xhuvani, Alfred Trebicka.