Atmosfera e skuadrës është e shkëlqyer, stërvitjet po zhvillohen me intensitet dhe lojtarët e rinj janë përshtatur shpejt me grupin, ndërsa Bekaj e Krasniqi tregojnë optimizëm për përballjen me Armeninë.
Kosova po vazhdon përgatitjet për dy miqësoret e këtij muaji, ku ndeshja e parë do të luhet sot në orën 19:00, kundër Armenisë në stadiumin “Fadil Vokrri”. Ekipi zhvilloi seancën e katërt stërvitore këtë të mërkurë, e cila u karakterizua nga angazhim i lartë dhe një atmosferë shumë pozitive brenda grupit. Trajneri Franco Foda është përqendruar maksimalisht te aspekti taktik, me synimin që skuadra të jetë sa më e përgatitur për sfidën e radhës.
Brenda kampit të Dardanëve mbizotëron harmoni dhe frymë grupi, ku edhe lojtarët e rinj, që janë grumbulluar për herë të parë me kombëtaren, po tregojnë përkushtim maksimal dhe janë integruar mjaft mirë në skuadër. Ky përkushtim po vërehet në çdo seancë stërvitore, duke rritur optimizmin për rezultat pozitiv në miqësore.
Një lajm i vetëm i padëshiruar vjen nga largimi i mbrojtësit Ismajl Beka për shkak të lëndimit. Pjesa tjetër e lojtarëve janë në formë të mirë fizike dhe kanë kryer stërvitjet me kapacitet të plotë. Portieri Visar Bekaj, pas përfundimit të stërvitjes, deklaroi se grupi po funksionon si një i vetëm dhe se atmosfera brenda ekipit është shembullore. Ai theksoi se synimi është fitorja në të dyja ndeshjet miqësore, pavarësisht vështirësisë që paraqet kundërshtari.
Bekaj shtoi se edhe lojtarët e rinj janë pritur shumë mirë në grup, duke përforcuar ndjesinë e bashkimit brenda skuadrës. Ai u shpreh i bindur se ekipi do të japë maksimumin në fushë, qoftë në miqësore, qoftë në ndeshjet kualifikuese.
Nga ana tjetër, anësori Ermal Krasniqi vlerësoi përgatitjet nën drejtimin e trajnerit Foda dhe theksoi rëndësinë e disiplinës taktike përballë Armenisë. Sipas tij, çdo futbollist është i vetëdijshëm për përgjegjësitë dhe është i gatshëm të kontribuojë në suksesin e ekipit kombëtar. Krasniqi vuri në dukje se Armenia është përmirësuar ndjeshëm, si në fazën mbrojtëse ashtu edhe në atë sulmuese, ndaj ekipi i Kosovës po punon fort për të analizuar çdo detaj të kundërshtarit.
