Raporti i ITUC tregon një përkeqësim të theksuar të të drejtave të punëtorëve në Shqipëri, me vendin që renditet mes shteteve ku kufizimet janë të forta dhe sfidat e përditshme vazhdojnë të mbeten të mëdha për punëtorët shqiptarë.
Në raportin e fundit të Konfederatës Ndërkombëtare të Sindikatave (ITUC), evidentohet një rënie e ndjeshme e të drejtave të punëtorëve në nivel global, ku Europa dhe Amerika kanë arritur rezultatet më të dobëta që nga viti 2014. Shqipëria nuk bën përjashtim, pasi është vlerësuar në kategorinë ku shkeljet janë të përsëritura, pavarësisht ekzistencës së ligjeve që mbrojnë të drejtat bazë të punëtorëve.
Banorë nga Fierit tregojnë për shqetësimet që hasin përballë mungesës së sigurisë në vendin e punës, si dhe vështirësitë që lidhen me mbrojtjen ligjore të të drejtave të tyre. Ata shprehen se situata është alarmante, sidomos në sektorët ku punëtorët janë më të ekspozuar ndaj shkeljeve.
Sipas raportit të ITUC, Shqipëria është renditur në kategorinë 3 për të drejtën e grevës, çka nënkupton kufizime të forta. Ky vlerësim i referohet vendeve ku, ndonëse ekziston një kuadër ligjor për grevat, shkeljet dhe presionet ndaj punëtorëve vazhdojnë të jenë të pranishme. Qytetarë të tjerë theksojnë domosdoshmërinë e përmirësimit të mbrojtjes për të drejtat e punëtorëve dhe kërkojnë më shumë mbështetje institucionale.
Raporti evidenton se, krahas Shqipërisë, edhe vende si Hungaria, Moldavia, Mali i Zi dhe Britania e Madhe janë kritikuar për përdorimin e ligjeve që kufizojnë grevat. Zgjerimi i përkufizimit të “shërbimeve thelbësore” ka sjellë një ngushtim të hapësirës për protestë, duke kufizuar ndjeshëm lirinë e punëtorëve për të mbrojtur interesat e tyre.
Avokati Adrian Abazi shpjegon se legjislacioni shqiptar parashikon të drejta të qarta për punëtorët, por zbatimi në praktikë shpesh lë për të dëshiruar. Ai nënvizon rëndësinë e monitorimit të vazhdueshëm të zbatimit të ligjeve dhe rritjen e ndërgjegjësimit për të drejtat në vendin e punës.
Ekspertët ngrenë alarmin se, nëse nuk ndërmerren reforma të thella dhe nuk garantohen të drejtat themelore, situata për punëtorët do të përkeqësohet edhe më tej. Qytetarët kërkojnë politika më të forta, transparencë dhe garanci për një të ardhme më të sigurt në tregun shqiptar të punës.
