Policia e Fierit zhvillon operacion të suksesshëm duke çmontuar një rrjet të prodhimit dhe shitjes së kanabisit, sekuestron armë zjarri, municion dhe qindra fidanë kanabisi, ndërsa arrestohen dy persona të përfshirë në aktivitetin kriminal.
Në Fier, një tjetër operacion i madh policor ka rezultuar me shkatërrimin e një rrjeti kriminal që merrej me prodhimin dhe tregtimin e lëndëve narkotike, si dhe posedimin e armëve të zjarrit pa leje. Operacioni, i koduar “Implicazione”, u organizua dhe u finalizua nga shërbimet e Policisë së Fierit, në bashkëpunim me forcat e posaçme operacionale.
Policia kapi dhe arrestoi dy shtetas, vëllezërit K. Sh., 47 vjeç dhe E. Sh., 26 vjeç, banues në fshatin Ngjeqar. Sipas burimeve zyrtare, këta persona prodhonin dhe shisnin kanabis në zonën e tyre, ndërsa mbanin në posedim edhe armë zjarri dhe municion luftarak. Gjatë ndërhyrjes, E. Sh. tentoi të largohej, por u arrestua menjëherë falë reagimit të shpejtë të forcave të policisë.
Gjatë kontrollit fizik, E. Sh. iu gjetën doza të gatshme kanabisi, të cilat i shiste në fshatin ku banonte. Hetimet zbuluan se aktiviteti i tyre kriminal zhvillohej në mënyrë të organizuar, duke përfshirë edhe kultivimin e kanabisit në sasi të mëdha.
Në banesën e të dyshuarve, policia gjeti dhe sekuestroi dy armë zjarri automatike, tre krehra, një thikë, doza të kanabisit, rreth 200 fara kanabisi dhe 179 fidanë të mbjellë në kubikë, të gjitha këto u sekuestruan si prova materiale në kuadër të çështjes.
Materialet procedurale janë referuar tashmë pranë Prokurorisë së Gjykatës së Shkallës së Parë të Juridiksionit të Përgjithshëm Fier, e cila do të vijojë me veprimet e mëtejshme ligjore ndaj të arrestuarve.
Ky operacion vjen si rezultat i angazhimit të vazhdueshëm të Policisë së Fierit dhe inteligjencës policore, që mbetet e fokusuar në goditjen e veprimtarive kriminale që cënojnë sigurinë e komunitetit.
