Bashkimi Europian ka reaguar për herë të parë pas zgjedhjeve të 11 majit, duke përgëzuar për organizimin dhe theksuar shqetësimet për presionin ndaj votuesve.
Në një deklaratë të përbashkët nga Zëvendëspresidentja e Komisionit Europian, Kaja Kallas, dhe Komisionerja për Zgjerimin, Marta Kos, Bashkimi Europian ka shprehur mbështetje për zhvillimin e zgjedhjeve në Shqipëri. Ata kanë përgëzuar të gjitha autoritetet për sigurinë e procesit zgjedhor dhe për organizimin e tij, që i dha mundësinë qytetarëve të ushtrojnë të drejtën e tyre demokratike për të zgjedhur përfaqësuesit e tyre në Parlament.
Në këtë rast, BE-ja ka theksuar rëndësinë e pjesëmarrjes së shqiptarëve jashtë vendit për herë të parë në zgjedhje, duke përshëndetur këtë si një hap të rëndësishëm për forcimin e demokracisë në vend.
Sipas raportit paraprak të Misionit të Vëzhgimit të Zgjedhjeve të OSBE/ODIHR, zgjedhjet u menaxhuan në mënyrë gjithëpërfshirëse dhe transparente, me një proces të qetë dhe të organizuar mirë, pavarësisht disa mangësive. Megjithatë, zgjedhjet u zhvilluan në një mjedis të polarizuar, ku garuesit nuk kishin kushte të barabarta për të konkurruar. Për shkak të përdorimit të gjerë të burimeve administrative dhe ndikimit institucional, pati pasiguri për mundësitë e barabarta për të gjithë kandidatët.
Akuza të shumta janë ngritur për presion mbi votuesit, veçanërisht ndaj punonjësve publikë, dhe ka pasur përpjekje të koordinuara për të hetuar dhe ndjekur penalisht krimet zgjedhore.
Në këtë kontekst, Bashkimi Europian ka mirëpritur përpjekjet për hetimin e keqpërdorimeve zgjedhore dhe ka theksuar se ndjekja e tyre është e nevojshme për të adresuar shqetësimet për manipulimet që mund të kenë ndodhur gjatë procesit zgjedhor. Gjithashtu, një tjetër shqetësim i ngritur ka qenë pavarësia e medias, ku është theksuar se mbulimi zgjedhor ka qenë i ndikuar nga partitë kryesore dhe ka mbetur i kufizuar transparenca në financimin e fushatës.
Bashkimi Europian do të vazhdojë të ndjekë nga afër zhvillimet zgjedhore deri në certifikimin përfundimtar të rezultateve.
Në këtë drejtim, BE-ja ka kërkuar që të gjitha forcat politike të sigurojnë funksionimin e vazhdueshëm të institucioneve të vendit. Po ashtu, është bërë thirrje për një dialog politik konstruktiv dhe gjithëpërfshirës, duke inkurajuar partitë dhe shoqërinë civile të kontribuojnë në avancimin e procesit të integrimit të Shqipërisë në Bashkimin Europian.
Për më tepër, Bashkimi Europian ka theksuar rëndësinë e vazhdimit të reformave të nevojshme për anëtarësimin e Shqipërisë në BE, duke përfshirë miratimin e një reforme të mëtejshme zgjedhore që adreson të gjitha rekomandimet e ODIHR-it dhe ato që janë ende të pazgjidhura nga zgjedhjet e mëparshme. Procesi i integrimit është një objektiv strategjik për Shqipërinë dhe një projekt që mbështetet nga qytetarët e saj.
