Tragjedia që ndodhi në një klub nate në Koçan, Maqedoninë e Veriut, ka marrë përmasa edhe më të rënda, pasi numri i viktimave është rritur në 59, ndërsa i të lënduarve ka arritur në 155. Lajmi është bërë i ditur nga Ministri i Brendshëm i Maqedonisë së Veriut, Pançe Toshkovski, i cili theksoi se një nga viktimat është edhe një oficer policie, i cili ndodhej në detyrë për të mbikëqyrur përdorimin e lëndëve narkotike në natën e tragjedisë.
Toshkovski gjithashtu sqaroi se janë lëshuar urdhër-arreste për katër persona, të cilët janë të lidhur me incidentin që ndodhi në diskotekën e Koçanit. Tragjedia ndodhi në orët e vona të mbrëmjes, dhe autoritetet kanë konfirmuar se deri në orën 11:30 të ditës së sotme, 59 persona kanë humbur jetën, prej të cilëve 35 janë identifikuar, ndërsa 31 prej tyre janë nga Koçani dhe 4 nga Shtipi.
Në kuadër të hetimit, Ministria e Punëve të Brendshme, në bashkëpunim me Prokurorinë Publike, ka nisur veprimet për të siguruar dokumentacionin për diskotekën në fjalë dhe për personat që janë të përfshirë në këtë tragjedi. Megjithatë, Ministri i Brendshëm ka qenë i përmbajtur në komentet e tij dhe ka theksuar se hetimi është ende në zhvillim e sipër, duke mos dashur të ndikojë në procesin hetimor.
Toshkovski shtoi se do të bëhet identifikimi i plotë i viktimave, dhe familjarët do të njoftohen menjëherë pasi të përfundojnë procedurat e nevojshme. Ai theksoi gjithashtu se ndjen një përgjegjësi të madhe morale për këtë ngjarje të tmerrshme.
Kryeministri i Maqedonisë së Veriut, Hristijan Mickoski, ka shprehur trishtim të thellë për tragjedinë, duke e cilësuar si një ditë të rëndë për vendin dhe duke shtuar se humbja është e jashtëzakonshme dhe se dhimbja e familjeve është e pamundur të përshkruhet. Tragjedia ka lënë pas një gjendje të rëndë dhe një shqetësim të thellë për të gjithë qytetarët e Maqedonisë së Veriut.
