Dy turistë gjermanë janë shpëtuar mbrëmjen e së enjtes nga shërbimet e Policisë së Gjirokastrës, pasi kishin humbur rrugën gjatë një ekskursioni malor në fshatin Labovë e Madhe. Mësohet se turistët kishin humbur orientimin për shkak të terrenit të vështirë dhe errësirës që i kishte kapluar gjatë eksplorimit.
Policia njofton se rreth orës 21:00, dy turistët gjermanë kërkuan ndihmë, duke lajmëruar për situatën e tyre të vështirë. Ata ishin izoluar në një zonë malore të thellë dhe nuk mund të gjenin rrugën për të dalë nga vendi ku ndodheshin.
Shërbimet e Seksionit të Forcës së Posaçme “Shqiponja” janë mobilizuar menjëherë për t’u dhënë ndihmën e nevojshme turistëve. Pasi kanë arritur në vendngjarje, ata kanë lokalizuar dy turistët dhe i kanë transportuar në gjendje të mirë shëndetësore në fshatin Labovë e Madhe.
Policia thekson se veprimet e shpejta dhe profesionale të shërbimeve, të cilat kishin njohuri për terrenin dhe kushte të vështira të natyrës, kanë bërë të mundur shpëtimin e turistëve pa ndodhur asnjë incident.
Ky rast tregon edhe njëherë rëndësinë e bashkëpunimit mes shërbimeve të sigurisë dhe vizitorëve për t’u siguruar që aventurat malore të mos kthehen në situata të rrezikshme.
