Partia Demokratike ka denoncuar një rast flagrant abuzimi nga ana e Bashkisë së Tiranës, e cila, sipas tyre, ka mbyllur rrugën “Alije Këlliçi” në fund të Fushës së Aviacionit, duke izoluar qindra familje.
Anëtari i Kryesisë së PD, Grigels Muçollari, ka akuzuar autoritetet se, në vend që të mbështesin banorët, ata janë bërë palë me klientët e Bashkisë dhe po u shkaktojnë atyre vështirësi të mëdha për më shumë se dy vite.
Sipas Muçollarit, banorët e kësaj zone janë të privuar nga e drejta për të hyrë dhe dalë nga banesat e tyre, pas mbylljes së rrugës nga Bashkia. Ai theksoi se familjet kanë ndërtuar shtëpitë e tyre me mundin e tyre dhe i kanë legalizuar ato, duke përfituar edhe kodin postal. Por, një projekt i papritur i Bashkisë ka bllokuar rrugën dhe ka bërë të pamundur lëvizjen e qytetarëve, duke i lënë të izoluar.
Muçollari e ka cilësuar këtë veprim të Bashkisë si një abuzim, duke theksuar se ky projekt ka interesa okulte dhe është në shërbim të ndërtuesve që kërkojnë të përfitojnë nga pronat e banorëve për të ndërtuar sipas kushteve të tyre. Ai ka shtuar se Bashkia është bërë palë me këta ndërtues dhe po punon kundër interesave të qytetarëve, duke shkelur kështu edhe ligjin dhe kërkesat e Autoritetit Rrugor.
Në fakt, sipas dokumenteve të siguruara nga PD, Autoriteti Rrugor ka informuar Bashkinë që ka detyrim ligjor për të zgjidhur këtë problem të banorëve për rrugët “Vëllazërimi” dhe “Alije Këlliçi”, dhe ka kërkuar që ky problem të trajtohet që prej vitit 2022. Megjithatë, Bashkia dhe Këshilli i Ministrave nuk kanë dhënë përgjigje, duke vazhduar përpara me projektin që mbyll rrugën dhe izolon familjet.
Muçollari ka paralajmëruar se ky projekt nuk do të ndihmojë as për shërbimet emergjente, si ambulanca dhe zjarrfikësja, që do të kenë vështirësi të arrijnë në zonë për t’u ofruar ndihmë qytetarëve. Ai theksoi se ky veprim shkel të drejtën e servitutit dhe rrezikon jetën e banorëve të këtij komuniteti.
Partia Demokratike ka kërkuar që Bashkia e Tiranës të japë një zgjidhje të menjëhershme për këtë çështje jetike për qindra familje. Po ashtu, PD ka ftuar shoqërinë “Salillari” të ndalojë punimet e jashtëligjshme që po bllokojnë rrugën dhe kanë shkaktuar kaos për banorët. Nëse ky problem nuk zgjidhet, PD ka paralajmëruar se do të dorëzojë një kallëzim penal për shpërdorim detyre.
Muçollari ka përfunduar duke theksuar se e drejta e servitutit është një e drejtë e garantuar nga ligjet e Shqipërisë dhe është njohur që prej Kanunit të Lekë Dukagjinit, dhe se qytetarët kërkojnë zgjidhje, jo përplasjen e klaneve brenda PS-së.
