Një hap i rëndësishëm drejt paqes në Ukrainë është hedhur, pasi përfaqësues të nivelit të lartë nga Shtetet e Bashkuara dhe Rusia pritet të takohen në Konferencën e Sigurisë në Mynih.
Presidenti amerikan Donald Trump konfirmoi takimin, duke njoftuar se në diskutime do të përfshihet edhe Ukraina.
Lajmi vjen pas një telefonate 90-minutëshe mes presidentit rus Vladimir Putin dhe homologut të tij amerikan, kontakti i parë i drejtpërdrejtë mes dy liderëve që nga përshkallëzimi i konfliktit në Ukrainë në shkurt 2022. Sipas Trump, ky komunikim ka hapur rrugën për negociata më të thelluara mes zyrtarëve të lartë të të dy vendeve.
“Ata do të kenë një takim nesër në Mynih. Rusia do të jetë atje me njerëzit tanë,” tha Trump gjatë një deklarate për shtyp në Shtëpinë e Bardhë. Ai shtoi se edhe Ukraina është e ftuar, por nuk dha detaje mbi formatin e bisedimeve apo nëse ato do të jenë një dialog trepalësh apo takime të ndara mes palëve.
Burime nga Kremlini konfirmuan se Moska e konsideron këtë zhvillim si një mundësi të rëndësishme për të nisur një proces diplomatik. Zëdhënësi Dmitry Peskov e cilësoi gatishmërinë e dy presidentëve për të hyrë në dialog si një arritje të madhe, duke nënvizuar se kjo ka aktivizuar aparatin diplomatik për të përgatitur negociatat e ardhshme.
Sipas Peskov, vendimet e nivelit të lartë tashmë u kanë dhënë zyrtarëve udhëzimet e nevojshme për të filluar procesin e komunikimit. Ai u bëri thirrje palëve për durim, duke theksuar se diskutimet kërkojnë kohë për të fituar vrull dhe për të prodhuar rezultate konkrete.
Konferenca e Sigurisë në Mynih pritet të jetë një arenë kyçe për këto negociata, duke qenë se mbledh zyrtarë të lartë nga e gjithë bota. Vëmendja tani është përqendruar te mundësia e një hapjeje të re diplomatike që mund të çojë drejt uljes së tensioneve dhe ndoshta, një marrëveshjeje paqeje për Ukrainën.
