Kreu i Partisë Demokratike, Sali Berisha, ka bërë akuza të rënda ndaj qeverisë gjatë një fjalimi përpara Këshillit Kombëtar të PD-së, duke deklaruar se arrestimi i kryebashkiakut të Tiranës, Erion Veliaj, ishte njoftuar përpara dy javësh nga Arben Ahmetaj.
Sipas Berishës, Ahmetaj kishte informacionet për këtë arrestim nga zyra e Edi Ramës, dhe ky veprim është pjesë e një skenari të mëtejshëm politik.
Berisha kujtoi një ngjarje të vitit 1991 në Parlament, duke e krahasuar situatën me atë të kohës së regjimit të Enver Hoxhës, duke theksuar se, siç ndodhte atëherë, edhe tani, qeveritarët e Tiranës janë përfshirë në skandale të shumta. Ai theksoi se gardëroba e Veliajt është aq e pasur, sa që mund të shtronte “tre hektarë qilima” dhe se ka prova për pagesa të dyshimta me para të mykura, që lidhen me trafikun e parave.
Berisha e akuzoi Veliajn për mbrojtje të aktiviteteve të trafiqit dhe veprime të tjera të jashtëligjshme, duke përmendur edhe gjetjen e 100,000 eurove të prerë në 500 eurosh, një shenjë që, sipas tij, është karakteristikë e trafikut të parave. Ai gjithashtu bëri thirrje për ndëshkim të gjykatësve që, sipas tij, kanë marrë vendime në favor të Veliajt dhe kundër opozitës, duke përmendur tre vendime gjyqësore të dyshimta që favorizojnë kryebashkiakun.
Në një tjetër pjesë të fjalës, Berisha e kritikoi ashpër Edi Ramën, duke theksuar se ai nuk ka asnjë të drejtë të përmendë babain e askujt, pasi, siç tha Berisha, babai i Ramës ka qenë një xhelat që ka firmosur për varjen e poeti të njohur, Havzi Nelës. Ai e përmendi këtë si një shembull të korrupsionit dhe keqpërdorimit të pushtetit nga ana e Ramës dhe qeverisë së tij.
Berisha e vazhdoi fjalimin duke akuzuar qeverinë për shkërmoqje dhe dështim të shtetit, duke thënë se Partia Socialiste po kalon në një krizë të thellë dhe po përballet me pasojat e abuzimeve të saj. Ai theksoi se qytetarët nuk ekzistojnë për Edi Ramën, i cili, sipas tij, i përdor ata vetëm për të vjedhur dhe për të pasuruar veten dhe aleatët e tij.
