Fluturimet mes aeroportit “Nënë Tereza” dhe Brukselit mund të pezullohen nesër, më 13 shkurt 2025, për shkak të një greve industriale në Belgjikë.
Autoritetet njoftojnë se asnjë prej aeroporteve belge nuk do të jetë operativ gjatë ditës, duke ndikuar drejtpërdrejt në linjat ajrore.
Si pasojë e kësaj greve, kompania ajrore Wizz Air ka paralajmëruar se dy fluturimet e planifikuara për nesër në itinerarin Tiranë – Bruksel Charleroi dhe anasjelltas mund të preken nga situata. Pasagjerët janë këshilluar të kontrollojnë statusin e fluturimeve përpara udhëtimit.
Grevës pritet t’i bashkohen punonjës të ndryshëm të sektorit ajror, përfshirë kontrollorët e trafikut ajror dhe stafin tokësor, çka mund të shkaktojë vonesa dhe anulime të shumta në të gjithë Belgjikën.
Ndërprerja e fluturimeve mund të krijojë probleme për pasagjerët që udhëtojnë për punë apo arsye familjare. Autoritetet ajrore dhe linjat e fluturimit po monitorojnë situatën dhe do të informojnë pasagjerët për çdo zhvillim të mëtejshëm.
Udhëtarët që kanë planifikuar të udhëtojnë drejt ose nga Belgjika këshillohen të marrin masa alternative ose të kontaktojnë kompanitë ajrore për të marrë informacion mbi mundësitë e rimbursimit apo riplanifikimit të udhëtimit.
Grevë të tilla industriale në sektorin ajror janë bërë të zakonshme në disa vende evropiane, duke ndikuar jo vetëm në transportin ajror, por edhe në sektorët ekonomikë dhe turistikë. Shqetësimet kryesore të sindikatave lidhen me kushtet e punës dhe pagat e punonjësve të aeroportit.
Përditësime të mëtejshme mbi situatën e fluturimeve pritet të jepen nga autoritetet aeroportuale dhe kompanitë ajrore në orët në vijim.
