Në orët e vona të natës, qyteti i Peqinit ka qenë nën kontrollin e intensifikuar të policisë.
Gjatë aksionit, janë kryer kontrolle të imtësishme në pothuajse të gjitha lokalet dhe automjetet që qarkullonin në rrugët e qytetit. Këto kontrolle kishin si qëllim kapjen e personave që mbajnë armë zjarri pa leje dhe ata që shpërndajnë lëndë narkotike, ndërsa një tjetër fokus ishin individët e shpallur në kërkim për vepra të ndryshme penale.
Sipas burimeve jozyrtare, kontrollet kanë qenë më të shpeshta në Peqin kohët e fundit, duke synuar identifikimin dhe kapjen e personave me probleme ligjore. Kjo masë është pjesë e një aksioni më të gjerë për të luftuar krimin dhe paligjshmërinë në qytet, që ka ngritur shqetësime tek disa qytetarë dhe pronarë lokalesh.
Një pjesë e rëndësishme e këtyre kontrolleve kanë qenë edhe lokalet që dyshohet se mbajnë aktivitete të paligjshme, si lojëra fati dhe frekuentohen nga persona të lidhur me shpërndarjen e drogës ose ata që mbajnë armë pa leje. Kontrolli i këtyre lokaleve ka ngjallur kundërshtime nga pronarët dhe disa qytetarë, të cilët kanë kritikuar mënyrën e veprimit të policisë.
Në disa raste gjatë kontrolleve janë regjistruar incidente. Disa qytetarë kanë raportuar se gjatë kontrollit, forcat e policisë kanë kërkuar t’u marrin telefonat personalë disa individëve. Pas refuzimit të fillimshëm, telefonat e disa personave janë marrë me forcë, duke shkaktuar më tej tensione.
Për disa orë, kontrolli ka përfshirë jo vetëm lokalet, por edhe automjetet që qarkullonin në të gjitha rrugët e qytetit të Peqinit. Disa persona janë shoqëruar për verifikim në Komisariatin e Policisë së Peqinit, ndërsa pas kontrollit, një grup qytetarësh janë grumbulluar përpara komisariatit, duke kërkuar shpjegime për shkeljet e mundshme të të drejtave të tyre gjatë aksionit të policisë.
Aksionet e befasishme të policisë janë mbështetur nga inteligjenca informative, që synojnë goditjen e paligjshmërisë dhe kapjen e personave në kërkim, si dhe ndalimin e qarkullimit të armëve dhe shpërndarjen e drogës. Megjithatë, ende nuk ka pasur një informacion zyrtar lidhur me rezultatet paraprake të këtyre kontrolleve.
Autoritetet kanë njoftuar se këto kontrolle do të vazhdojnë dhe do të përfshijnë të gjitha akset rrugore dhe lokalet në qytet, duke shtuar edhe më tej angazhimin për sigurimin e rendit dhe paqes në Peqin. Pavarësisht tensioneve, aksionet mbeten një pjesë e rëndësishme e luftës kundër krimit dhe paligjshmërisë në këtë zonë.
