Në kuadër të 80-vjetorit të Çlirimit të Atdheut, në ambientet e Muzeut Historik të Fierit u organizua një aktivitet vlerësues për pasardhësit e Luftës Antifashiste Nacionalçlirimtare (LANÇ).
Ky jubile i rëndësishëm u shënua me një ceremoni të veçantë, ku Bashkia Fier nderoi me certifikata mirënjohjeje një sërë veprimtarësh dhe aktivistësh të Komitetit të Veteranëve dhe Pasardhësve të LANÇ, si dhe përfaqësues të Organizatës së Dëshmorëve të Atdheut.
I pranishëm në këtë aktivitet ishte kryetari i Bashkisë Fier, Armando Subashi, i cili në fjalën e tij përshëndetëse vlerësoi rolin e këtyre organizatave në ruajtjen dhe promovimin e vlerave historike të Luftës Antifashiste Nacionalçlirimtare. Subashi theksoi rëndësinë e punës së tyre në mbrojtjen e kujtesës kombëtare dhe në edukimin e brezave të rinj me frymën e sakrificës dhe patriotizmit.
Ceremonia u pasua me ndarjen e certifikatave të mirënjohjes për kontribuuesit kryesorë, duke nxjerrë në pah përkushtimin e tyre në ruajtjen e traditave dhe në organizimin e aktiviteteve që promovojnë historinë dhe vlerat e LANÇ.
Kronika
Ky aktivitet, përveçse një shenjë nderimi për ata që ruajnë dhe transmetojnë trashëgiminë historike të luftës, shërben edhe si një moment reflektimi për rëndësinë e kontributit kombëtar në çlirimin e vendit nga pushtuesit.
Në ceremoninë festive, atmosfera ishte mbushur me emocione dhe krenari kombëtare, teksa të pranishmit ndanë kujtime dhe histori nga brezat e mëparshëm. Familjet e dëshmorëve dhe pasardhësit e tyre falënderuan Bashkinë Fier për këtë vlerësim të veçantë, duke theksuar rëndësinë e bashkëpunimit për ruajtjen e trashëgimisë kombëtare.
Aktivitete të tilla janë një dëshmi e angazhimit për të mos harruar sakrificat e atyre që luftuan për lirinë e Shqipërisë dhe për të mbajtur gjallë frymën e patriotizmit në shoqëri.
