Altin Meçaj, 46 vjeç, ka rrëfyer versionin e tij lidhur me ngjarjen ku u dhunua nga një efektiv policie, i cili dyshohet se e akuzoi për ngacmim ndaj motrës së tij.

Sipas deklarimit të Meçajt, ai kishte bërë një koment komplimentues në rrjetet sociale ndaj një gruaje që e njihte prej vitesh, pasi vinin nga i njëjti fshat. Ai thekson se nuk kishte asnjë qëllim dashakeq dhe se komenti ishte thjesht vlerësim për rrugëtimin e saj në jetë.

Meçaj shprehet se ishte kthyer në Shqipëri për festat e fundvitit dhe se nuk e kishte takuar personalisht gruan prej vitesh. Ai pohon se nuk ka pasur asnjë marrëdhënie apo tentativë ngacmimi dhe se situata, sipas tij, është keqinterpretuar rëndë.

46-vjeçari deklaron se dhuna e ushtruar ndaj tij ishte e pajustifikueshme dhe se nuk e kupton se si çështja ka përfunduar në një akt ekstrem dhune, duke theksuar se mes tij dhe gruas nuk ka pasur asnjë kontakt fizik apo komunikim përtej rrjeteve sociale.