Forcat e sigurisë së Jemenit kanë arrestuar të shtunën 194 emigrantë nga Briri i Afrikës, të cilët po tentonin të hynin ilegalisht në vend përmes brigjeve të provincës Shabwa, në juglindje të Jemenit. Lajmi është bërë i ditur nga Ministria e Brendshme e Jemenit, e cila ka theksuar se operacioni u realizua pas një vëzhgimi të afërt nga autoritetet.
Sipas deklaratës së ministrisë, emigrantët u arrestuan ndërsa ishin në anijen që po i afronte brigjeve të Jemenit, në distriktin Radhum të provincës Shabwa. Në mesin e të arrestuarve, 121 janë etiopianë, përfshirë 70 gra, 46 burra dhe pesë fëmijë, ndërsa 73 të tjerë janë nga Somalia, kryesisht burra.
Autoritetet e sigurisë kanë nisur procedurat ligjore për ata që janë kapur, duke i akuzuar për hyrje të paligjshme në territorin jemenas. Ky incident ka rritur shqetësimin mbi migracionin e paligjshëm dhe rreziqet që emigrantët përballen gjatë udhëtimeve të tyre.
Rruga detare që lidh Bririn e Afrikës me Jemenin është një nga më të rrezikshmet në botë. Emigrantët shpesh udhëtojnë në anije të mbipopulluara dhe të papërshtatshme për udhëtime në det, të cilat operohen nga kontrabandistë. Shpesh këto anije janë të rrezikshme dhe nuk ofrojnë kushte të sigurta për pasagjerët.
Shumë emigrantë që përpiqen të arrijnë në Jemen dhe më pas të kalojnë në vendet e Gjirit, e bëjnë këtë për shkak të mundësive të pakta për punësim në vendet e tyre të origjinës. Sipas raportimeve të mëparshme nga Kombet e Bashkuara, gjatë vitit të kaluar, rreth 60,897 migrantë afrikanë kanë udhëtuar drejt Jemenit përmes rrugëve detare të rrezikshme.
Emigrantët që marrin këtë rrugë shpesh janë të pasigurt dhe të ekspozuar ndaj abuzimeve nga kontrabandistët dhe grupet e tjera kriminale që përfitojnë nga nevoja për të arritur në vendet e pasura të Gjirit. Ndërkohë, autoritetet jemene po përpiqen të menaxhojnë fluksin e emigrantëve, duke forcua masat e sigurisë për të parandaluar hyrjen ilegale në vend.
Ky incident tregon gjithashtu përpjekjet e vazhdueshme të autoriteteve jemene për të kontrolluar kufijtë dhe për të mbajtur nën kontroll migracionin e paligjshëm, duke theksuar se Jemen, megjithëse ka probleme të brendshme, po vazhdon të jetë një destinacion për emigrantët afrikanë që kërkojnë mundësi më të mira jetese.
