Policia e Gjirokastrës, në bashkëpunim me Prokurorinë, ka ndërmarrë një aksion të gjerë këtë të mërkurë për goditjen e lidhjeve të paligjshme të energjisë elektrike. Burime konfidenciale bëjnë me dije se autoritetet lokale janë duke ekzekutuar urdhër-arreste për rreth 16 punonjës të OSHEE në Rajonin e Gjirokastrës, të cilët dyshohet se kanë shpërdoruar detyrën dhe kanë lejuar lidhje të paligjshme të energjisë.
Punonjësit që po targetohen janë pjesë e sektorit teknik të OSHEE dhe akuzohen për favorizimin e lidhjeve të paligjshme në rrjetin e shpërndarjes së energjisë elektrike në këtë rajon. Këto veprime dyshohet se kanë sjellë një dëm të konsiderueshëm për sistemin e furnizimit me energji dhe për të ardhurat e kompanisë shtetërore.
Operacioni i ndërmarrë është ende në zhvillim dhe autoritetet po vijojnë hetimet për zbardhjen e plotë të ngjarjes. Deri tani, nuk ka asnjë informacion zyrtar nga policia dhe prokuroria e Gjirokastrës në lidhje me detajet e aksionit dhe rezultatet e tij. Megjithatë, ky aksion është një pjesë e përpjekjeve për të luftuar veprimtarinë e paligjshme në sektorin e energjisë, që ka sjellë pasoja të mëdha për sigurinë dhe funksionimin e sistemit elektrik në vend.
Ky aksion i forcave të rendit vjen pas një periudhe hetimesh intensive dhe si rezultat i informacioneve të mbledhura për lidhjet e paligjshme të energjisë që dyshohet se janë favorizuar nga disa punonjës të OSHEE. Hetimet do të vazhdojnë për të përcaktuar shkallën e përfshirjes dhe për të marrë masa ligjore kundër personave përgjegjës.
