Prokuroria e Elbasanit çon për gjykim 13 persona të përfshirë në një rrjet ndërkombëtar prostitucioni, mes tyre tutorë, klientë dhe shtetase të huaja.
Një hetim disa mujor i Prokurorisë së Elbasanit ka zbuluar dhe çuar për ndjekje penale një rrjet të strukturuar prostitucioni, ku përfshiheshin shtetase nga Amerika Latine dhe vende të tjera. Prokuroria përfundoi hetimet dhe dërgoi për gjykim 13 persona, për akuzat e “prostitucionit” dhe “shfrytëzimit të prostitucionit”, sipas neneve 113/2 dhe 114/2 të Kodit Penal.
Në qendër të këtij rrjeti kriminal qëndronin dy shtetas të huaj, F.G. dhe J.G., të cilët rekrutonin dhe transportonin vajza të huaja drejt Shqipërisë, duke i vendosur në qytete të ndryshme për të ushtruar aktivitet seksual kundrejt pagesës. Ata operonin përmes një skeme të organizuar, ku rol kyç kishin edhe bashkëpunëtorët lokalë.
Prokuroria përdori operacione të stimuluara dhe agjentë të infiltruar për të dokumentuar veprimtarinë kriminale. U sekuestruan para të shënuara, telefona celularë, komunikime komprometuese dhe prova të tjera që vërtetojnë strukturën e rrjetit.
Të dërguarit për gjykim përfshijnë: 2 organizatorë të akuzuar për shfrytëzim prostitucioni, 2 shtetas të dyshuar si klientë që përfitonin shërbime seksuale dhe 8 gra nga Amerika Latine të akuzuara për ushtrimin e prostitucionit. Mes të pandehurve është edhe një person që ndihmonte në shfrytëzimin e viktimave.
Veprimtaria kriminale shtrihej në disa qytete të Shqipërisë dhe bazohej në platforma ndërkombëtare online, ku reklamaheshin shërbimet me fotografi dhe tarifa për çdo takim. Këto faqe i lehtësonin kontaktet me klientët vendas dhe të huaj.
Prokuroria konfirmoi se ka dokumentuar të gjitha lidhjet e brendshme të rrjetit, duke ndriçuar bashkëpunimin mes organizatorëve dhe pjesëtarëve të tjerë të skemës.
Zyra e Prokurorisë në Elbasan ka njoftuar se do të ndjekë nga afër çdo zhvillim të mëtejshëm të kësaj çështjeje penale, me qëllim që të gjithë të përfshirët të përballen me drejtësinë dhe të mbajnë përgjegjësi për veprimet e tyre.
